TAGBILARAN CITY, Bohol (PIA) — Nahatagan og daku nga kahigayunan ang mga mag-uuma sa Bohol nga makapamaligya sa ilang mga produkto sa nabuksan nga usa sa mga highlights sa tinuig nga selebrasyon sa sa Sandugo Festival.
Gatusan ka mga mag-uuma sa Bohol ang naghakot sa ilang mga produkto ngadto sa agricultural fair nga nagdala sa tema nga “Mga Mag-uuma ug Mananagat nga Bol-anon Nagpabiling Malig-on sa Pagbatok sa Nag-usab-usab nga Panahon,” gibuksan ang Sandugo Agri-Fair sa Bantawan, sa Old Airport ning syudad niadtong Hulyo 15.
Ang Office of the Provincial Agriculturist (OPA) ubos sa Provincial Government of Bohol ang nanguna sa pagpahiluna niini diin milanat sa 5 ka adlaw nga pamaligya o taman sa Biyernes, Hulyo 19.
Gipangunahan ni Provincial Administrator Asteria Caberte ang pagbukas sa kalihokan kauban nila Board Member Nathaniel Binlod, DA7 PATCO Maria Chona Maleza , Atty. Abel Damalerio isip representante ni Cong. Edgar Chatto, ug Executive Assistant John Paul Maslog isip representante ni Cong. Vanessa Aumentado.
Ang Agri-fair usa ka highlight nga kalihokan sa “Tabo” stream sa mas dako, ug mabolokon nga selebrasyon sa Sandugo sa Bohol 2024.
Gisalmotan ang agri-fair sa mga mamaligyaay gikan sa tibuok probinsya aron ipakita ang ilang mga ani ug gisalmotan sa mga mangingisda ug mag-uuma, 26 ka local government units, ug 7 ka line agencies nga naglakip sa Agricultural Promotion Center (APC), Agricultural Training Institute (ATI), Bureau of Fisheries and Aquatic Resources (BFAR), Philippine Carabao Center (PCC), Philippine Crop Insurance Corporation (PCIC), Bohol Island State University (BISU) ug BES.
Gisalmotan usab kini sa 6 ka pribadong exhibitors nga mao ang Adamco, Marcela Farms, Polymer, Pryce Gas, Purple Women ug New Hope.
Kini nahiuyon sa Strategic Change Agenda ug Abante Vision ni Gobernador Erico Aristotle Aumentado, nga nagpakita sa kultura ug kabilin sa Bohol sa lain-laing mga kalihokan nga giplano sa tibuok Pilipinas ug nag-inusarang UNESCO Global Geopark Regenerative Island Province. (ECB/PIA7-Bohol)
