TAGBILARAN CITY, Bohol (PIA) — Mipagawas ang Securities and Exchange Commission Cebu Extension Office (SEC-CEBEO) og advisory batok sa Loan Star Investor Corporation nga nigamit og peke nga SEC Certificate sa pangbiktima sa publiko pinaagi sa laraw nga gitawag og Advanced Fee Loan Scam o Advance Fee Loan Fraud.
Gitambagan ang publiko nga dili makig-lambigit sa mga tawo nga nagrepresentar sa dili rehistrado nga lending company.
Ang SEC certificate nga gigamit niini nagdala sa ngalan nga LOAN STAR INVESTOR CORPORATION ubos sa SEC Reg. Numero CS201314761 nga giingong gi-isyu sa SEC-CEBEO.
Matud pa sa SEC nga ang Loan Star Investor Corporation wala nakarehistro ug peke ang sertipiko niini.
Ang Advance Fee Loan Scam o Advance Fee Loan Fraud usa ka pamaagi diin ang mga biktima kinahanglan nga mobayad sa usa ka piho nga kantidad baylo sa pagpagawas sa utang.
Kinahanglang magdeposito ang mga biktima isip pruweba sa ilang kapabilidad sa pagbayad, nga nagpasiugda nga dili kini bayad apan idugang sa kita-on sa utang nga ilang madawat.
Dugang pa, ang mga biktima giaghat sa paghatag sa ilang mga detalye sa bank account ug sa ulahi gimandoan sa pagdeposito og laing kantidad aron ma-unfreeze ang ilang account, pagsiguro nga ang mga kita sa loan ma-disburse.
Si SEC-CEBEO director, Atty. Sheara Lupango-Tamayo, miklaro nga ang mga Financing o Lending Companies wala gitugotan nga mag-require sa mga kliyente nga mobayad og cash bugti sa pag-apruba o pag-release sa ilang mga utang.
Sa imbestigasyon, ang kompanya nakit-an nga naglihok sa ilang modus pinaagi sa Facebook Acct: TEACHER & GOVERNMENT EMPLOYEE PERSONAL LOAN (https://www.facebook.com/profile.php?id=61555748742157).
Ang mga moapil niining mga matang sa mga kalihokan adunay tulobagon sa paglapas sa Article 315 Swindling (estafa) ug/o Article 172 (falsification) sa Revised Penal Code (RPC) sa Pilipinas.
Mahimong mangayo og tabang ang mga biktima sa Philippine National Police (PNP) ug sa National Bureau of Investigation (NBI) sa pagsang-at og mga reklamong kriminal batok sa mga naghimo niini nga mga scam.
Mahimo usab silang magpadala og impormasyon o report bahin sa mga tawo o entidad nga naggamit sa giingon nga peke nga SEC Certificate ug/o pag-apil sa nahisgotang pamaagi sa Enforcement and Investor Protection Department pinaagi sa email sa [email protected] ug sa SEC Cebu Extension Office sa [email protected]. (ECB/PIA7-Bohol)
