MISAMIS ORIENTAL (PIA) – Gipahigayon ang usa ka Appreciation Conference sa Records Management and Archiving Ministry sa United Church of Christ in the Philippines (UCCP) sa ilang city church sa Cagayan de Oro niadtong Abril 6. Tumong sa kalihukan ang pagpahibalo sa mga partisipante kabahin sa kamahinungdanon sa records management.
Kapin sa 28 ka mga volunteer ang mitambong sa kalihukan, nga naglakip sa mga retirado, empleyado sa simbahan, ug mga miyembro sa eskwelahan nga kabahin sa ministry.
“Sakit sa dughan nga makita nga kasagaran ginapasagdan ra ang mga records,” sumala ni Rev. Haniel Taganas, senior pastor sa UCCP.
Gisaysay ni Taganas nga usa siya sa mga pastor sa ilahang simbahan sa Bradford UCCP nga nahimutang sa Ozmeña Blvd., dakbayan sa Cebu, diin ilang nasinati ang kalisod sa pag-restore sa usa ka chapel nga naa na sa gidugayong 100 ka tuig.
Nabati nila kung unsa ka importante ang paghipos ug pag-amping sa mga dokumento ilabina sa ilang pagpangandam sa ika-100 nga anibersaryo sa kapilya, diin gusto nilang mahibaw-an ang tubag sa pangutana kung nganong ginganlan kini og “Bradford,” ug kinsa ba kini siya.
Sumala ni Taganas, ang nakatabang aron mahatagan og hustong pasidungog ang kapilya mao ang mga archives niini didto sa Estados Unidos. Tungod niini, nagtuo siya nga dakog ikatabang ang ing-ani nga kalihukan ilabina sa pagsaulog usab sa 108 ka tuig sa UCCP sa Cagayan de Oro.
Sa maong panagtigom, mipaambit sa iyang kahanas si Cedric G. Dayta, secretary sa Sangguniang Bayan sa Lugait, pinaagi sa paghisgot sa saktong paagi sa paghipos ug pag-amping sa mga importanteng dokumento kon archiving.
Naghatag usab si Dayta og dugang kahibalo kabahin sa archives ug records, archives administration, ug records management, aron mas masabtan sa mga partisipante ang ilang papel sa maong proseso.
“Tinguha sa maong panagtigom ang pagtukod og Records Management and Archives sa UCCP City Church sa Cagayan de Oro karong tuiga,” matod pa ni Dayta.
Si Dayta usa ka kasamtangang miyembro sa board of trustees sa Society of Filipino Archivists, Inc., ug kanhi sakop sa National Archives Committee sa National Commission for Culture and the Arts (NCCA). Miyembro usab siya sa West Misamis Oriental Historical and Cultural Society kon WEMOHaCS. (Lugait LGU/PIA 10-Misamis Oriental)
