SYUDAD SANG ILOILO (PIA) – Nakahanda na security coverage sang Police Regional Office (PRO) sa Kabisayaan Nakatungdan sang Philippine National Police para sa Semana Santa subong nga tuig.
Sa isa ka press release, ginpahayag ni PRO 6 Regional Public Information Office chief Police Colonel Arnel Solis nga iga-deploy ang mga kapulisan sa strategic kag importante nga mga lugar nga ginatipunan sang mga katawhan kaangay sang mga simbahan, pier, terminal, mall kag pila ka mga tourist spots sa rehiyon.
Dugang pa diri, magabutang man ang PRO-6 sang police assistance desks sa ini nga mga lugar agod masiguro ang seguridad sang publiko, lokal man nga mga residente ukon mga turista nga gikan sa iban nga rehiyon.
Pahayag ni Police Brigadier General Jack L. Wanky, regional director sang PRO-6, ang deployment sang mga kapulisan ang nagakoordinar sa lokal nga mga pamunoan kag iban pa nga mga ahensya sang gobyerno.
Dugang pa niya nga magasuporta man diri ang mga opisyal kag tanod sa mga barangay kag iban pa nga mga force multipliers kag volunteers.
Apang, maglowas sa police assistance desk, magapatigayon man ang kapulisan sang mga foot kag mobile patrol, checkpoint kag iban pa nga mga law enforcement operation.
Suno kay Wanky, malauman nga madamo sa mga katawhan ang magabyahe pakadto sa naglain-lain nga mga religious sites subong nga Semana Santa agod magbisita sa mga simbahan kag iban pa nga mga lugar, apang ang iban magapauli sa ila mga probinsya ukon magbisita sa mga tourist destination.
Angut sini, ginapanugyan niya sa publiko nga pangitaon kag i-save ang hotline numbers sang pulis kag iban pa nga mga ahensya sang gobyerno sa lugar nga kadtuan para sa gilayon nga bulig pananglitan nga kinahanglanon. (AAL/FRG/PIA6/lakipan sang report gikan sa Police Regional Office 6)
