SAN JOSE, Antique (PIA)—Ginapasiguro kang Antique PNP ukon Antique Provincial Police Office ang seguridad sa ginapaabot nga selebrasyon kang Pista Minatay kag To Dos Los Santos.
Sa sangka hinun-anun, ginhambal ni Police Lieutenant Colonel Willy D. Diel, hepe kang Provincial Community Affairs and Development Unit (PCADU), ang importansya nga magsunod ang publiko sa mga layi kag patakaran nga gintukod kang mga otoridad para masiguro ang tawhay nga pagbisita sa sementeryo ukon sa simbahan bilang pag-obserbar sang All Saints kag All Souls Day.
Ginadumilian ang publiko sa pagdara kang mga delikado nga kagamitan, armas, ukon mga bagay nga makadisgrasya sa okasyon,” hambal ni Diel.
Ginadumilian man ang publiko sa pagdara ka makahurubog nga irimnun sa sementeryo pati man ang mga baraha kag iban pa nga gaming gadgets nga maka disurbo sa publiko.
Ginasiguro kang PNP nga ang preparasyon para sa seguridad and ginahimo kaimaw ang mga ahensya kang gobyerno, lakip ang pagpatuman kang kahandaan sa sunog, trapiko, kag iban pa.
Ginapangabay man ang pagbulig ka mga opisyales ka barangay para masiguro ang kalinong kag katawhay sa tagsa ka mga lugar nga nasakpan.
Ginpahayag ni Diel nga ang mga kapulisan ipadara man sa mga kabanwahan antes ang okasyon, para magpasiguro kang katawhan kang kalinong.
Ginapanugyan ang mga komunidad nga mangin alerto agud malikawan nga mangin biktima ukon makakomiter kang krimen kag mag-antos ukon maghinulsul sa urihi.
Ginsiguro na nga ang Antique PNP preparado kag alerto, nga tumanon ang andang mandato nga magmentenar kang kalinong kag katawhay. (AGP/PSM/PIA Antique)
