Ginapangunahan ni Police Regional Office (PRO) 6 Regional Director PBGEN Jack L. Wanky ang pagpatigayon sang mga inspeksyon sa nagkalain-lain nga mga terminal kag iban pa nga mga lugar nga ginatilipunan sa Iloilo City, Abril 16, agod ma-monitor ang sitwasyon kag kahimtangan sang mga PNP personnel kag force multipliers ga gin-deploy para sa security coverage sang Semana Santa. (Laragway gikan sa PRO6-RPIO)
SYUDAD SANG ILOILO (PIA) – Ginkabig sang Police Regional Office (PRO-6) sang Philippine National Police (PNP) sa Kabisayaan Nakatungdan nga malinong ang pagsaulog sang Semana Santa subong nga tuig.
Sa press release nga ginpaguwa sang PRO-6 Regional Public Information Office, ginkilala sang ahensya ang koordinasyon kag pagnibuligay sang mga opisyal sang simbahan, mga local government units, mga force multipliers kag iban pa nga mga volunteer groups.
Bangud sini, ginapasalamatan ni Police Brigadier General Jack L. Wanky, regional director sang PRO-6, ang mga LGU, iban nga mga ahensya sang gobyerno, mga opisyal kag tanod sa barangay, mga rescue group kag iban pa para sa ginhatag nga serbisyo nga nagresulta sa matawhay, malinong, kag nga selebrasyon.
Ginkilala man ni Wanky ang dedikasyon sang kada isa nga katapo sang PNP sa bug-os nga rehiyon para sa ila nga kontribusyon sa pag-implementar sang security plan sa ila tagsa ka mga area of jurisdiction.
Dugang pa diri, importante man para sa PRO-6 ang tayuyon nga pagpalapnag sang impormasyon bahin sa pagpatuman sang layi nga naghatag giya sa publiko sa mga dapat himuon kaangay sang mga pahanumdom kag maayo nga mga buhat nga naangot sa lowas nga pagbyahe, malinong kag matawhay nga bakasyon, kag wala ti gamo nga pagpatigayon sang mga hilikuton sa mga simbahan.
Ginalauman ni Wanky nga magpadayon ang ini nga katumanan agod magpabilin nga malinong ang rehiyon nga angay sa pagpuyo, pagpamuhunan kag pagnegosyo.
Matandaan nga lakip sa nangin security coverage sang PRO-6 para sa Semana Santa ang pag-deploy sang mga PNP personnel sa pagbantay sa mga aktibidad kaangay sang misa, prosesyon kag Visita Iglesia. Lakip na ang pabutang sang mga police assistance desk sa mga tourist destination, puerto, terminal kag mayor nga dalanon sa bug-os nga rehiyon.
Sa pihak nga bahin, pila ka mga insidente ang nalista sang Health Emergency Management Section (HEMS) sang Department of Health Western Visayas Center for Health Development (DOH WV CHD) sa rehiyon sugod Abril 13 (Domingo de Ramos) tubtob Abril 20 (Domingo sang Pagkabanhaw).
Lakipan diri ang tatlo ka mga insidente sang pagkalunod, anom ka mga heat-related incident, 67 ka mga aksidente sa dalanon, kag anom ka mga pamilya ukon 18 ka mga indibidwal nga apektado sang sunog nga tuga sang napabay-an nga nagasiga nga kandila.
Angot diri, ginhatagan pagtamod sang DOH WV CHD ang pagpangaman, edukasyon kag nagakaigo nga aksyon bilang importante nga mga instrumento sa pagsabat ukon paglikaw sa ini nga mga katalagman.
Sa pahayag sang ahensya, malikawan ang ini nga mga trahedya kon mahatagan ang tagsa ka mga pumuluyo sang husto nga ihibalo kag magbinuligay ang tanan para sa pagpasanyog sang lowas nga palibot kag ikaayong-lawas. (AAL/FRG/PIA6/lakipan sang mga report gikan sa PRO-6) kag DOH WV CHD)
