TAGBILARAN CITY, Bohol (PIA) – Siradohan una ang tulay nga puthaw sa Abatan sa Maribojoc, nga naa sa Tagbilaran City North Road, ug nunot niini, buksan sa two-way traffic ang bag-ong sementado nga tulay.
Kini maoy kasayuran nga gipagawas sa Department of Public Works and Highways (DPWH) Bohol First Engineering District, human mamatikdi nga kabahin sa approaches sa nahisgutan nga tulay, nadaut tungod sa nahumokan nga embankment.
Matud ni District Engineer John Paul Gascon, kinahanglan nga sirad-an dayun ang tulay nga puthaw kay ang slab nga anaa sa approaches sa tulay, nangabuak tungod sa pagpangalu-ag sa sansan sa embankment kay nahumukan.
Subay niini, matud sa DPWH, ang tanan nga mga sakyanan ug motorista nga gikan sa Maribojoc nga adto unta moagi sa tulay nga puthaw, nga adto na moagi sa sementado nga tulay, hangtud nga libkason na sa DPWH ang temporaryo’ng pagsira.
Nanaad ang DPWH nga magbutang og mga aviso ug traffic signs aron makabantay na nga daan ang mga motorista aron magiyahan ang tanan. (RAHC/PIA Bohol)
