SYUDAD SANG ILOILO (PIA) — Nagpatigayon sang send off ceremony ang Iloilo City kag Iloilo provincial government para sa ila tiglawas sa Aliwan Fiesta nga hiwaton sa Manila sa Hunyo 27-29, 2024.
Gindugukan sang mga Ilonggo ang nasambit nga hilikuton para sa Tribu Pan-ay sang Hunyo 13, kung sa diin sila ang nagpakita sang kabahin sang ila mangin performance para sa palaabuton nga Aliwan Fiesta.
Ang Tribu Pan-ay nga ginabug-usan sang mga estudyante humalin sa Fort San Pedro National High School ang nagdaog sa tinalikdan nga Dinagyang Festival, rason nga sila ang mangin representante sang syudad sa Aliwan Fiesta.
Ginalauman nga magapakita sang maanyag nga performance ang Tribu Pan-ay sa Aliwan, kung sa diin masaksihan sang mga tumalan-aw ang kultura kag tradisyon sang syudad pinaagi sa ila choreography, costumes, kag music.
Samtang nagpatigayon man sang isa ka send off ceremony ang Iloilo provincial government para sa Tultugan Festival nga ila mangin opisyal nga tigluwas sa Aliwan matapos ang pagdaog sini sa ginhiwat nga Kasadyahan sa Kabanwahanan sang Enero 2024.
Ang Tultugan amu ang opisyal nga festival sang banwa sang Maasin, kung sa diin nagapakita ini sang importansya sang industriya sa kabutungan, nanari-sari nga gamit sang kawayan, kag manami nga tunog sini bilang isa ka musical instrument.
Ginpahayag ni Gov. Arthur Defensor Jr. nga naghatag ang provincial government sang P8 million nga bulig sa grupo para sa ila preparasyon sa Aliwan.
Kung matandaan, ulihi nga nakuha sang Iloilo City, pinaagi sa Tribu Parianon, ang kampyonato sa Aliwan Fiesta nga ginakabig pinakadako nga cultural festival sa pungsod. (AAL/JNH/PIA Iloilo)
