SYUDAD SANG ILOILO (PIA) — Padayon ang paghatag sang serbisyo sa beterinaryo sa mga kabanwahanan sa probinsya sang Iloilo sa pagpanguna sang Office of the Provincial Veterinarian (OPV) kaupod ang mga agricultural technicians sa mga lokal nga panguluhan.
Tuyo sang ini nga hilikuton nga mapasanyog ang ikaayong lawas sang mga kasapatan kag ang pagka produktibo sang mga lokal nga mangunguma.
Nalakip sa inisyatibo ang deworming, vitamin supplementation, kag mga nagakadapat nga interbensyon agud matapna ang internal parasites kag mapabakod ang resistensiya kag ma-improba ang dayon nga pagdako sang kasapatan.
Suno sa gobyerno probinsyal, importante ang ini nga mga serbisyo agud masiguro nga mapadayon ang pagsagod sang kasapatan kun sa diin ini ang nagapanguna nga palangabuhian sa komonidad sa kaumhan sa probinsya.
Gina-engganyo man ang mga mangunguma nga magpakig-angot sa talatapan sang agrikultura sa kabanwahanan para sa mga schedules kag dugang nga bulig. (AAL/LMLE/PIA Iloilo)
