BACOLOD CITY (PIA) – Protektado na batok sa pagkahulog sang lupa ukon bato ang mga motorista nga nagabyahe sa bahin sang Bacolod South Road (BSR) sa munisipyo sang Cauayan, Negros Occidental.
Ini matapos makumpleto sang Department of Public Works and Highways (DPWH) ang road slope protection sa nasambit nga lugar.
Sa isa ka press release sang DPWH, ginhambal ni Region 6 Director Sanny Boy Oropel nga ang proyekto ginalakipan sang duha ka slope protection walls nga may kataason nga 460 kag 331.5 metro.
Ini nga protection walls may yara man sang line canal kag hagdan.
Dugang pa, gin-install man ang 105.3 metro kwadrado nga wire mesh system nga may erosion control mat sa bahin sang Barangay Linaon bilang dugang nga proteksyon sa anay landslide-prone area.
“Ang ini nga proyekto ginapunggan ang soil erosion kag rockfall nga nagasiguro sang hilway nga dalanon sa tunga sang Kabankalan kag Hinobaan,” hambal ni Director Oropel sa Ingles nga lenggwahe.
Suno sa DPWH, nagapasalamat ang mga residente sang lugar, ilabi na ang mga mangunguma kag manugpangisda, bangud wala na sang masami nga pagkahulog sang lupa kag bato nga nagabalabag sa kalsada kag nagapadugay sa pagdeliver sang ila mga produkto.
Luwas sa kabuhi, protektado man sang proyekto ang iban pa nga mga pampubliko nga imprastraktura kag propiedad malapit sa lugar.
Ang ini nga slope protection project nagabalor P96.5 milyones kag gin-implementar sang DPWH Negros Occidental 3rd District Engineering Office. (AGP/BPS/PIA Negros Occidental)
