KALIBO, Aklan (PIA) — Nagbukas eon ro bag-o eang nga gin-inagurahan nga P12.7 milyon nga fishport sa Barangay Magpag-ong sa Batan, Aklan, nga kung siin may 3,840 panimaeay ro makabenepisyo nga kaeabahan hay nakadepende ro pangabuhian sa pagpangisda.
Ro nasambit nga investment facility hay ginpundohan paagi sa Department of Agriculture- Philippine Rural Development Project (DA-PRDP), kaibahan ro Gobyerno Probinsyal it Aklan.
Gintaw-an it importansya sa report it Office of the Provincial Agriculturist iya, nga ro Magpag-ong fishport hay ginakonsiderar nga isaea ka importante nga pag-umwad nga kung siin nagaserbe raya bilang pilot fishport sa probinsya it Aklan.
Para sa komunidad it Magpag-ong ag mga kaeapit nga barangay, ro fishport ay bukon eamang it isaeng pasilidad kundi ginakunsiderar nanda nga lifeline bangod raya hay magaserbeng hub ukon common ag central landing area, docking, ag trading operations it tanan nga pangisdaan ag iban pang produkto halin sa baybay it nasambit nga banwa agud makabulig man nga mapadasig ro andang pagbaligya sa mga banwa it Altavas (Southern Eastern), Balete, ag Banga (Southern Western), ag sa kapital nga banwang Kalibo.
Ro fishport hay magatao man it mas manami nga access ag madugangan ro fishery market, trade, ag socio-economic nga mga aktibidades.
Dugang pa, ro bag-ong fishport hay makabulig sa pagsabat sa mga hangkat sa logistics ag mabuhinan ro mga post-harvest nga pagkapirde samtang ginapinasadya ro mga lokal nga mga socio-economic nga mga oportunidad.
Samtang, ginhambae ni Aklan Governor Jose Enrique Miraflores nga ro nasambit nga proyekto mapuslanon guid ag nagpabutyag ro gobyerno probinsyal it kalipay ag pagpasaeamat sa pagdaea it makarayang proyekto nga makabulig gid sa maabo nga mga mangingisda ag sa andang pamilya, boatmen, ag mga negosyante.
“Padayon kita sa pagtao it pangabuhian ag suporta sa atong mga igmanghod nga mangingisda nga nagasakripisyo agud makatao it pagkaon sa bilog natong komunidad,” hambae ni Miraflores.
Mag-euwas sa pagpabaskog it pangisdaan, ro Magpag-ong fishport ro magatao man it trabaho ag magasuporta sa mga negosyo nga may kaangtanan sa pangisdaan. Ro raya nga pantalan ginatan-aw nga makatao it gahum sa mga lokal nga mangingisda, makapaumwad it andang pangabuhian, ag makapagpapagsik sa pag-uswag it ekonomiya sa probinsya.
Sakop sa project’s influence area hay 5,130.85 ektarya, kaibahan ro 4,057 ektarya it eugta ag 1,073.85 ektarya it pangisdaan.
Dugang pa, ro mga benepisyaryo it proyekto sa sueod it project influence hay 15,749 nga populasyon, kaibahan ro 3,840 nga mga panimaeay ag 3,840 mga rehistradong mangingisda. (AGP/SQP/PIA Aklan)
