SYUDAD SANG ILOILO (PIA) — Gin-aprubahan sang Guimaras Provincial School Board ang pundo nga P20,500,000 nga gintalana para sa Special Education Fund (SEF) sa ini nga tuig.
Sa ginhiwat nga sinapol, ginpangunahan ni Gov. JC Rahman Nava kaupod ang mga representante sang gobyerno probinsyal kag Department of Education (DepEd) ang pagdiskusyon sang mga priority areas sang funding.
Ang nasambit nga pundo ang pagagamiton sa mga proyekto nga magapasanyog sa kalidad sang edukasyon kag suporta sa pagdihon sang mga bumulutho sa probinsya.
Nalakip sa mga proyekto nga napaidalom sa 2025 SEF amo ang pagtukod sang mga school pavilions, mga aktibidad sa isports, suporta para sa Early Childhood Care and Development program, kag paghatag honorarium para sa mga manunudlo nga kabahin sang Local School Board. (AAL/PIA-ILOILO/LMLE)
