SYUDAD SANG ILOILO (PIA) – Pormal nga gin-inagurahan sang Social Security System (SSS) – Iloilo Central branch ang ila bag-o nga opisina sa City Mall sa Pavia, Iloilo sang Oktubre 24, 2024.
Sa ginhiwat nga programa, ginpahayag ni SSS officer-in-charge president kag CEO Atty. Voltaire Agas nga ang kahiwatan nagapakita sang dedikasyon sang ahensya para mas mapasangkad ang ila serbisyo sa pumuluyo.
“This symbolizes our dedication to providing social protection to our constituents. To our stakeholders, we really pledge to deliver efficient and compassionate service,” pahayag ni Agas.
Ang bag-o nga opisina sang ahensya may kalaparon nga halos 1,237 square meters, kung sa diin ini ang ginalauman nga makahatag sang mas manami kag matawhay nga serbisyo sa ila stakeholders, lakip na ang pensioners.
“Compared to our previous location, the area now is really comfortable and accessible as it is bigger. We are located on the ground floor, making it easier for our pensioners to transact, and we have wider parking space,” siling ni SSS Visayas West 2 Division senior communications analyst Amiel Genova.
Samtang, ginhingyo ni Social Security Commissioner Eva B. Arcos ang mga Ilonggo nga makipagbahin sa SSS, pinaagi sa ila paghatag sang kontribusyon bangud para man ini sa ila kaayuhan.
“SSS has different services that it can offer. So, I encourage the public to contribute as it is also for our welfare and of course, our family, our dependents,” pahayag ni Arcos.
Ang bag-o nga opisina sang Iloilo Central branch nagasakop sang mga miyembro gikan sa mga banwa sang Ajuy, Anilao, Barotac Nuevo, Barotac Viejo, Cabatuan, Calinog, Concepcion, Dingle, Janiuay, Lambunao, Pavia, Santa Barbara, kag Sara sa probinsya sang Iloilo; kag mga distrito sang City Proper, Jaro kag Lapaz sa syudad sang Iloilo.
Lakip sa mga nagtambong sa programa sanday SSS Senior Vice President for Visayas Operations Group Helen Solito, SSS Visayas West 2 Division Vice President Angelo Blancaver, SSS Iloilo Central head Eva Cura, Iloilo Provincial Administrator Dr. Raul Banias, kag Pavia Vice Mayor Edsel Gerochi. (AAL/JNH/PIA Iloilo)
