SYUDAD SANG ILOILO (PIA) — Ginpanginbulahan sang 61st Infantry Battalion ang gobyerno probinsyal sang Iloilo tungod sa dako nga suporta sini tuhoy sa pagbungkag sa mga rebelde nga grupo sang Southern Panay Front Komiteng Rehiyon – Panay nga napaidalom sa CPP-NPA-NDF, partikular sa bahin sang nahauna kag ikaduha nga distrito sang probinsya.
Sa ginhiwat nga flag ceremony sang kapitolyo, ginhatagan ni Brig.Gen. kag Commander Michael Samson sang pagkilala si Gov. Arthur Defensor, Jr. bilang nagapanguna sang Provincial Task Force to End Local Communist Armed Conflict (ELCAC) kaupod ang miyembro sang Sangguniang Panlalawigan.
Ginpahayag ni Samson sa iya mensahe ang dako nga bahin sang probinsya sa pagsuporta sang mga hilukuton agud mapasanyog ang kalinong kag katawhay.
“The task force provided the necessary assistance to former rebels, encouraging many to return. They have seen that the provincial government is ready to receive them and offer livelihood and financial assistance, and opportunities to reunite with their families and become productive citizens, ” suno kay Samson.
Ginpakigbahin man ni Samson ang mga engkwentro nga natabo sa bahin sang militar kag mga rebelde ilabi na sa mga lugar nga nasakop sang Tubungan, Leon, Igbaras, Miag-ao, San Joaquin, kag probinsya sang Antique.
“We exerted effort to pressure the remaining NPAs to realize that fighting the government is futile. That is why many members of the southern front surrendered and went back to the folds of the law, ” mensahe ni Samson.
Ginpasidunggan man sa ini nga kahiwatan sanday Provincial Administrator Raul Banias, Provincial Social Welfare and Development Office, Provincial Planning and Development Office, kag Provincial Focal Person for Peace and Order Mary Rose Matucan bangud sa ila nga kontribusyon sa kawsa.
Ang pagpakig-away sang militar sa mga rebelde may tinutuyo sa pagtuga sang malinong nga palibot nga makabulig sa pag-uswag kag pagpatigayon sang mga programam sang gobyerno sa lokal kag nasyunal nga lebel. (AAL/LMLE/PIA Iloilo)
