SYUDAD SANG ILOILO (PIA) – Isa ka surprise drug testing operation para sa mga driver sang Public Utility Vehicles (PUVs) ang ginpatigayon sang Land Transportation Office (LTO) – 6 sa syudad sang Iloilo sang Abril 15 bilang kabahin sang ila “Oplan Harabas.”
Ginhiwat ang operasyon sa Ceres Terminal sa Barangay Tagbak, Jaro, Iloilo City, kag Mohon Terminal sa Arevalo district kun sa diin ini nga inisyatibo ang kabahin sang kampanya sang LTO-6 agud masiguro nga ang public transport operators nagasunod sa mga safety standard, ilabi na sa pagdamo sang mga nagabiyahe subong nga Semana Santa.
Sa datos sang LTO-6, ara sa 156 tanan ka PUV drivers, lakip na ang mga nagamaneho sang taxi, tricycle kag modernized bus, ang gin-test para sa paggamit sang iligal nga droga kun sa diin apat diri ang nagpositibo kag magapaidalom sa confirmatory testing sa Philippine Drug Enforcement Agency (PDEA) bilang hugot nga pagsunod sa Dangerous Drugs Act.
Ang nasambit nga inisyatibo ang gin-implementar sa bulig sang Philippine Drug Enforcement Agency (PDEA), Philippine National Police (PNP), Department of Health (DOH), Land Transportation Franchising and Regulatory Board (LTFRB), kag Iloilo City government.
Ginhatagan pagtamod ni LTO-6 director Atty. Gaudioso P. Geduspan nga ang operasyon kabahin sang mas malapad nga pagtinguha sang ahensya nga mabuhinan ang mga aksidente sa kalsada nga may kaangtanan sa mga driver nga yara sa impluwensya sang iligal nga droga.
“Despite intensified enforcement efforts, the Philippines still records an average of 12,000 road crash fatalities each year, with approximately 500 of these occurring in Western Visayas alone,” dugang pa ni Geduspan.
Samtang, ginpahayag ni LTO-6 assistant director Jeck Conlu nga ang ahensya nagapabilin nga dedikado sa pagpasanyog sang drug-free transport system kag pagpasanyog sang road safety sa bug-os nga rehiyon.
Ini nga inisyatibo sang LTO-6 ang nagasuporta man sa “Oplan Biyaheng Ayos: Semana Santa and Summer Vacation 2025” sang Department of Transportation (DOTr) nga nagasiguru sang kaluwasan kag kaayuhan sang nagabiyahe nga publiko, ilabi na sa peak travel seasons. (AAL/JNH/PIA Iloilo)
