TAGBILARAN CITY, Bohol (PIA) — Tabang legal alang sa mga opisyales sa barangay ug mga kalungsuran nga walay sarang ikagasto aron pagtubag sa mga pasangil sa Buhatan sa Ombudsman nga giduso alang kanila.
Kini ang gipadayag ni board member Jiselle Rae Villamor, kinsa sakop sa legal team nga naghimo usab sa mosyon aron tun-an pag-usab sa Ombudsman ang sumbong nga grave misconduct, gross neglect of duty ug conduct prejudicial to the best interest of the service.
Gawas sa mga kapitan, mayor ug mga opisyal sa lalawigan ug rehiyonal nga mga buhatan nga gilangkob sa sumbong, naduhig usab si Gobernador Erico Aristotle Aumentado sa kiha.
Ang pasangil, nga nagsukad sa pagkatukod, pagpadagan sa negosyo, ug pagpalapad sa Captain’s Peak Garden and Resort sa Canmano Sagbayan, us aka resort nga napabarug taliwala sa Chocolate Hills Natural Monument (CHNM).
Ang CHNM, nadeklara na nga lugar nga angay panalidpan ug dili tandugon.
Ang nahisgutan nga resort, napabarug, nagpadagan sa negosyo ug gani, gipalapdan pa, nga wala makakuha sa gikinahanglan nga Environmental Impact Asessment (EIA), Environmental Compliance Certificate (ECC) ug Special Use Agreement in Protected Areas (SAPA) gikan sa Department of Environment and Natural Resources Environmental Management bureau, nga gikinahanglan sa mga ingon niini nga development sulod sa protected areas.
Samtang wala pa ma gobernador si Aumentado sa pagtukod sa Captains Peak Garden Resort, ang mga kapitanes nga naligsan usab sa kaso, nasilotan sanglit sila ang mga sakop sa Protected Areas Management Board (PAMB), ug pipila kanila nakaapil sa paglagda sa temporaryong pag-endorsar sa PAMB sa proyekto ubos sa pipila ka kondisyones.
Alang sa mga kapitan kang kinsa nga honorarium isip kapitan dili ikasarang sa kahagu sa trabaho isip frontline worker sa goberno, ang pagkuha sa unom ka buwan nga honorarium kay nadamay lamang, sobra na sa angay nga isilot sa mga mahimong inosente sa suspension.
Sa unom ka buwan, himoon sa Ombudsman ang imbestigasyon, ug niini, gikinahanglan nga makapadala sa ilang tuba gang mga nakasohan, aron dili molahos na ngadto sa silot administratibo, kon dili kini tagdon.
Niini, una na nga gipadayag ni Aumentado nga motabang siya sa pagpahiluna sa depensa sa mga walay ikagasto sa kaso aron maandam ang tubag, pinaagi sa pribado nga abogado nga gikan sa kaulohan alang niini.
Magpadayon ang akong suporta sa mga kauban ug magpasalamat ko sa mga trabahante sa Kapitolyo ug mga katawhan sa kanunay nga gihatag nga suporta nganhi kanako, matud pa sa gobernador.
Sa mga nahiuban sa suspension, gidugang sa gobernador, “Kining problemaha, diha na kini sa una pa, ug collateral damage lamang kita niining hitabo, patin-aw niya s amga naangin nga mga opisyales”.
“Atubangon ta kini, kay nasayud ang Ginoo kon unsa ang anaa sa atong kasingkasing,” aghat sa gobernador. (RAHC/PIA Bohol)
