TAGBILARAN CITY, Bohol, Jan. 24 (PIA) — Sa ubang kalungsuran, molanat sa 14 ngadto na sa 9 ka oras nga walay serbisyo sa suga ug gahum dagitab ang masinati karon na nga Sabado, Enero 28, tungod sa ipahigayon nga tinuig nga preventive maintenance services sa mga linya ug kahimanan sa kutay sa suga nga dagitab.
Hinuon, kini nga pahibaw gikan sa National Grid Corporation of the Philippines (NGCP) wala maglakip sa mga kalungsuran, nga gialagaran sa mga public utilities nga may inland nga tinubdan ug pwede nga maggamit sa nahibiling land-based power generators, sama sa kadtong nasulod sa prangkisa sa Bohol Electric Cooperative II ug Bohol Light Company Inc.
GIpaabut usab hinuon ang pahibaw sa duha ka power distribution utilities nga magbutang sa ilang mga katikaran kabahin sa serbisyo sa koryente.
Segun sa pahibaw nga nasukip sa Notice of Scheduled Power Interruption sa NGCP, ang mga konsumidor sa koryente sa lungsod sa Carmen, Batuan, Bilar ug Sagbayan makasinati sa labing taas nga lanat sa 14 ka oras nga brownout.
Dinhing dapita, magsugod ang pagkapawong sa suga ug serbisyo sa koryente sa alas 4:01 sa kaadlawon hnagtud na sa alas 6:00 sa kahaponon sa susamang adlaw, Enero 28.
Napulo ug usa usab ka oras nga pagkapalta sa serbisyo sa suga ug koryente ang masinati sa mga konsumidor sa Baclayon, Alburquerque , Loay, Loboc, Sevilla, Lila, Dimiao, Dauis, ug Panglao, nga magsugod sa alas 4:01 sa kaadlawon hangtud sa alas 3:00 sa palis sa susamang adlaw.
Sa cheduled Power Interruption notice, gibutyag sa NGCP nga sa mga konsumidor sa koryente sa nahisgutang mga lungsod, magsugod kawagtang ang ilang serbisyo sa suga ug gahum dagitab sa may alas 4:01 sa kaadlawon hangtud sa alas 3:00 sa palis.
Sa laing bahin, siyam ka oras nga brownout ang masinati sa mga konsumidor sa Tubigon, Calape, Clarin, Inabanga, Catigbian, Balilihan, San Isidro, Maribojoc, Loon, Antequera ug Cortes nianang adlawa.
Sa mga naulahi nga lungsod, magsugod ang ilang brownout sa alas 4:01 sa kaadlawon hangtud sa alas ala una sa palis.
Samtang nanghangyo ang NGCP sa dyutay nga pailob, gipasabut usab niini nga ang annual preventive maintenance activities us aka lakang sa paglikay sa wala damha nga mga kakuli-an nga mahiabut sa wala maatiman nga mga linya ug kahimanan.
Gipasalig usab sa NGCP ilang ibalik dayon og pakatap ang serbisyo sa higayon nga nahuman na nila ang ilang mga maintenance nga kalihukan. (RAHC/PIA7 Bohol)
