PUNDO SA PROYEKTO. Nanawagan si Carl John Legazpi ngadto sa mga Bol-anon ang suportahan ang Tagbilaran City Half Marathon, nga maoy ilang pamaagi sa pagtigum og salapi nga ilang magamit sa mga outreach programs lakip na ang adopt a school, pabahay ug mobilization sa kapolisan paingons a mga komunidad. (PIA Bohol)
TAGBILARAN CITY, Bohol (PIA) – Gipadayag sa mga tinugyanan sa City Police Force ubos ni City Police Chief Lt. Col. John Kareen Escober ang operational direction sa kapolisan sa syudad ug kini ang OPLAN LIMPYO Tagbilaran.
Didto sa Kapihan sa PIA, gipadayag ni deputy police chief, Lt. Adriel John Francisco, nga gawas sa flagship programs sa Philippine National Police, ang Tagbilaran City Police magtutok sa mosunod: law enforcement ug local ordinance compliance nga magatutok sa pagpatunhay sa kahapsay, kalinaw ug sa pagpatuman sa mga local nga gipandayng balaod ug mga sumbanan.
Tutokan usab nila ang Intensified Anti-Illegal Drugs Operations nga matutok sa pagbuntog sa pagpayuhot sa illegal nga drugas ug sa pagpahigayon sa pagpahiuli sa mga biktima sa drugas, saysay ni Francisco.
Buot usab sa kapolisan nga may mobilization sa mga katawhan sa Komunidad, aron makatabang sa sinawhan nga misyon sa pagpakunhod ug pagbuntog sa kriminalidad, dugang ni PCMS Carl John Legazpi, kinsa kauban ni Francisco sa radio forum nga mabati sa DyTR AM matag Biyernes sa hapon, 4:00 p.m.-5:00 p.m.
Ipadayon usab ang pagpatrolya isip pamugong sa krimen, kay ang presenysa sa kapulisan, daku na kayo og mahimo sa pagpugong sa pagbuhat sa krimen.
Usa usab sa ilang prayoridad mao ang Yielding Clean and Safe Environment, aron ipasaka ang kahimtang sa mga molupyo u gang kaluwasan sa komunidad ilabi na batok sa katalagman.
Niining tanan, dili usab nila talikdan ang operational readiness ug ang internal cleansing sa organisasyon aron mapatunhay ang integridad ug ang katakus sa kapolisan nga makig-away sa krimen, makig-estorya sa pagpahiuli sa mga may salaud ug pagpalapad pa sa ilang kapasidad sa pagtubag sa tawag sa nanginahanglan. (RAHC/PIA Bohol)
