TAGBILARAN CITY, Bohol (PIA)–Isip dakong kalamposan alang sa lalawigan sa Bohol, ang syudad sa Tagbilaran ug Panglao nakasakmit og mga nag-unang posisyon sa Department of Trade and Industry (DTI) Cities and Municipalities Competitiveness Index (CMCI) program.
Ang Panglao, nabantog sa limpyo nga mga baybayon ug madasigon nga industriya sa turismo, nakakuha sa Top 1 nga pwesto sa Economic Dynamism Pillar ug Top 2 alang sa Infrastructure Pillar alang sa 3rd-4th Class Municipalities nga kategorya.
Kini, samtang ang syudad sa Tagbilaran, ang kaulohan sa probinsiya, milabaw sa ikaduhang dapit nga ranking sa Government Efficiency Pillar alang sa Component Cities.
Kini nga mga pag-ila nagpasiugda sa talagsaong mga lakang nga nahimo sa duha sa pagpausbaw sa ilang kompetisyon.
Ang CMCI nag-evaluate sa nagkalain-laing bahin sa performance sa lokal nga gobyerno, lakip na ang economic dynamism, government efficiency, infrastructure, resiliency ug innovation.
Sa laing bahin, ang lungsod sa Dauis nabutang sa Top 8 sa Economic Dynamism and Infrastructure Pillars, alang sa 3rd-4th Class Municipalities.
Ang lungsod sa Clarin mao usab ang Top 8 sa 5th-6th class municipalities, sa Economic Dynamism Pillar, nga nagpakita sa iyang potensyal sa pagtubo ug economic trajectory.
Ang lungsod sa Catigbian nakahimo usab og epekto diin nakakuha sa Top 8 sa Innovation Pillar, nga nagpakita sa iyang dedikasyon sa pagpalambo sa mga innovative practices.
Ang mga lungsod sa Sevilla ug Pres. Garcia, parehong 5th Class Municipalities, giila nga Most Improved LGUs.
Ang Sevilla nahimutang sa Top 9, samtang ang Pres. Garcia nahimutang sa Top 10, nga nagpasiugda sa ilang mahinungdanong pag-uswag ug mga paningkamot sa pagpalambo sa lokal nga pagdumala. (ECB/PIA7-Bohol)
