ILIGAN CITY (PIA) – – Subay sa pagsaulog sa National Women’s Month, gilunsad sa HULMA-Iligan Creatives Collective, kauban ang The Threaded Tales Organization ug Department of Trade and Industry (DTI) Lanao del Norte, ang The Feminine Grace, aron ibida ang mga talento ug kaalam sa kababayen-an bahin sa sining.
Ubos sa tema nga “Empower, Express, Elevate,” gipasiugdahan ang mga exhibit, workshop, ug pagbaligya sa mga produkto nga naghatag og dakong pagtagad sa kontribusyon sa kababayen-an sa sining ug panginabuhian.
Gisugdan ang kalihokan pinaagi sa Mabulokong Kurba Fashion Show, diin gipakita sa mga designer ang ilang abilidad sa pag-recycle sa daan nga mga sinina ug paghimo niini og bag-ong sinina pinaagi sa mabulukong disenyo.
Si Anna Leah Sanson, head sa Designs Cluster sa HULMA-Iligan ug in-house designer sa Kuri-Kuri Lokal ug Espasyo, nagdasig sa sustainable fashion samtang gipalambo ang identity sa kultura sa Iligan. Pinaagi sa proyekto nga Hinayhay, naggamit siya og traditional Maranao textiles aron mabag-o ang daan nga mga panapton, samtang naghatag og oportunidad sa kababayen-an nga mahimong kabahin sa industriyang panapton.
Gikan sa panginabuhian nga proyekto, nahimong kabahin na usab kini sa mental health support, diin nakahatag og kalihokan sa kabatan-onan nga makapaminus sa stress ug makahatag og dugang kita. Ginabaligya ang ilang mga produkto sa Espasyo, usa ka hub alang sa mga lokal nga artisan, nga naglakip sa sinina nga nagkantidad og P200 hangtod P1,000.
“Continue to equip yourself, i-equip gyud imong kaugalingon sa mga kahibalo kay di matag-an in the future kung unsay mahitabo, at least naa gyud kay kahibalo nga mutabang kanimo sa pag-sustiner sa kinabuhi,” sumala niya.
Tungod sa tabang sa mga donors ug suporta sa DTI, libre ang workshop alang sa crafting ug negosyo. Ang DTI naghatag og materyales ug suporta, nga nakatabang sa pagpaila sa Iligan-made nga mga produkto sa Manila FAME, usa ka international trade expo diin nabida ang ilang produkto sulod sa duha ka tuig.
“DTI in itself basta kaya naman gagawin po because ang gobyerno is laging handang tumulong sa mga Micro, Small and Medium Enterprises para lumago sila,” sumala ni Florence Paler, Senior Trade Industry Specialist sa DTI Lanao del Norte,
Samtang, pinaagi sa Gahum: Women’s Power on Canvas, gibida sa mga kababayen-an ang ilang sining. Usa na niini si Krista Marie Abing, nga estudyante sa Iligan City East National High School.
“Akong iingon lang kay bahalag unsa ka bati o kaayos ang skills, continue lang, keep practicing aron imong maperfect imong pagbuhat,” iyang mensahe sa mga kabatan-onan.
Bisan og nagdamgo siyang mahimong zoologist, tungod sa iyang gugma sa mga hayop, magpadayon siya sa pagpintal isip pamaagi sa pagpahayag sa kaugalingon.
Samtang nagpadayon ang Art Tabo Market, diin gihatagan og higayon ang mga lokal nga artisan nga mabaligya ang ilang mga handmade creations sa Espasyo.
Magapadayon ang kalihokan sulod sa tibuok bulan sa Marso sa HULMA Center sa Barangay Poblacion, diin adunay libre nga workshops alang sa crochet, beadwork, embroidery, ug floral arrangement. (LELA/PIA-10/Lanao del Norte)
