Aron sa pagbantay sa posibleng epekto sa taliabot nga hulaw ug sa nagsugod na nga naglagiting nga kainit nga nasinati karon sa tibuok lalawigan sa Zamboanga del Norte, daling gimugna ang TASK FORCE EL NIÑO ning probinsya pinaagi sa Provincial Disaster Risk Reduction and Management Council (PDRRMC) Biyernes, Mayo 12 niining tuiha atol sa Pre-Disaster Risk Assessment Meeting On El Niño Phenomenon sa Hall 3, Capitol Building Estaka ning dakbayan sa Dipolog.
Si Atty. Uldarico M. Mejorada II, PDRRMC Executive Director nga maoy presiding officer sa maong panagtagbo, mainiton nga ming-abi-abi sa bag-ong Provincial Administrator nga si Mr. Wilberth “Jojo” Magallanes nga mitambong sa maong meeting.
Ang bag-ong administrador sa probinsya nga nag-representar ni Governor Rosalina “Nanay Nene” Jalosjos sa nasangpit nga panagtigom namahayag, nga ang kagamhanang probinsyal mihimo sa inisyatiba nga adunay preparasyon niining gikataho nga taliabot nga El Niño Phenomenon.
Dugang ni Mr Magallanes nga buot sa gobernador nga adunay pagahimuong lakang aron mapugngan ang dakong distroso sa katilingban ug sa tibuok probinsya sa maong kalamidad.
Tumong usab ni Nanay Nene ang seguridad alang sa mga ZaNortehanons.
Niini, malampusong namugna ang TASK FORCE EL NIÑO ZAMBOANGA DEL NORTE nga gikalatid nga unang nakamugna sa tibuok rehiyon 9.
Ang chairman sa Task Force El Niño mao si Atty. Ricky Mejorada II, Vice-Chairman si DILG Provincial Director Oliver B. Ombos samtang ang mitambong sa maong panagtigom atomatik kining miyembro sa maong Task Force El Niño.
Usab, adunay 6 ka sub-committees ang gimugna nga mao ang 1.) Food Security Committee-Chairman ang Office of the Provincial Agriculturist (OPAG) uban sa Provincial Social Welfare and Development Office (PSWDO),
2.) Water Security Committee-Chairman ang Provincial Engineering Office (PEO) uban sa Bureau of Fire Protection (BFP), 3.) Energy Security Committee-Chairman PEO uban sa PDRRMO, 4.) Health and Nutrition Committee-Chairman Provincial Health Office (PHO) uban sa ZN-Philippine Red Cross ug PSWDO, 5.) Safety Committee-Chairman ZNPPO uban sa 97th IB, 6.) Information and Education Committee-Chairman Provincial Information Center (PIC) uban sa PAG-ASA, DepEd, DOST ug DILG.
Subay niini, ang PAG-ASA miluwat sa pamahayag nga pagkakaron, anaa na sa 80% ang El Nino alert level ang nasud sa Pilipinas.
Ang Dipolog City ug ang tibuok Zamboanga del Norte, numero uno sa tibuok Zamboanga Peninsula nga nakatagamtam sa 45°C nga heat index. Matud pa sa PAG-ASA nga kini ang tukma nga panahon sa pagpangandam sa gituohan nga taliabot nga hulaw, sanglit gituohan nga mo-grabe pa ang kainit sa panahon nga gikataho nga molungtad pa sa tuiga 2024 ang masinati nga El Niño.
Alayon niini, ang kagamhanang probinsyal sa liderato ni Governor Nanay Nene Jalosjos nagpahimangno sa pinalangga nga ZaNortehanons, nga “stay indoors and stay hydrated” alang sa seguridad sa tanan nga dili mahitumpawak sa heat stroke tungod sa nasinati karon nga naglagiting nga kainit sa panahon nga nasinati sa probinsya. (PIC-JOEUE SACOL RAMIREZ & MISHEL BALA-MONTEDERAMOS, RAYMOND JAMES GARROVILLO-Photographer)
