TUBOD, Lanao del Norte (PIA) — Midaug ang Team Quibranza Dimaporo sa 2025 nga piniliay sa nasyonal ug lokal nga lebel.
Giproklamar sa Provincial Board of Canvassers si Imelda “Angging” Quibranza Dimaporo isip bag-ong napiling representante sa 1st District, pagkahuman sa iyang termino isip gobernador.
“I am honored to serve you once again now as your Congresswoman in the 1st District of Lanao del Norte with a greater and renewed dedication and purpose to further advocate for the peace and development of our province,” sumala niya.
Samtang, midaog isip gobernador si Mohamad Khalid Quibranza Dimaporo human sa iyang termino isip 1st District Representative. Gidayeg sab niya ang tanang mitabang sa malinawon ug limpyo nga eleksyon, ilabina ang mga magtutudlo, volunteers, ug security forces.
“To all the chosen leaders, tapos na ang election, it’s time to work hard para sa atong probinsya. Magtulong-tulong tayo to build a progressive Lanao del Norte for the generations to come,” sumala niya.
Sa laing bahin, napili pag-usab si Sittie Aminah Quibranza Dimaporo isip representante sa 2nd District, nga ikaduhang termino sa Kongreso.
“Nagtan-aw ko nga padayon ‘kong mag-alagad kaninyo sa akong ikaduhang termino isip Kongresista sa 2nd District sa Lanao del Norte. Ang inyong pagsalig ug kumpiyansa kanako naghatag ug dugang kadasig sa ako nga molihok pa ug mas lig-on aron masiguro nga magpadayon ang malungtarong kalambuan sa 2nd congressional district,” matod niya.
Napili usab si Allan Lim isip Bise Gobernador para sa iyang ikaduhang termino.
Ang giproklamar nga Board Members sa 1st District mao sila: Bob Andot, Sidick Dibaratun, Setty Deamila Macarambon, Grecille Matalines, ug Eleuterio Obial, Jr.
Sa 2nd District, mao sila: Cristy Atay, Abdany Buanding, Apta Malawani, Maida Tawantawan, ug Superman Usop Jr.
Nagpasalig ang tanang napiling opisyales nga magpadayon sila sa panaghiusa ug paningkamot aron mapadayon ang kalinaw ug kalambuan sa Lanao del Norte, uban ang ilang tinud-anay nga pagserbisyo sa katawhan. (LELA/PIA-10/Lanao del Norte)
