SYUDAD SANG ILOILO (PIA) — Ginhatagan sang dako nga importansya sang gobyerno probinsyal ang pagtukod sang mga School-Based Multipurpose Teen Centers sa ginhiwat nga 2024 Provincial Teen Center Day kun sa diin naglab-ot sa 600 ka mga peer helpers, guidance counselors, kag teen center coordinators sa probinsya ang nagtipon.
Suno sa gobyerno probinsyal, ang teen centers nagahatag sang libre nga espasyo para sa mga teenagers nga magbaton sang giya kag laygay sa bahin sang reproductive health.
Nagaserbe man ini nga avenue sa mga pamatan-on nga makakuha sang mga resources agud mapasanyog ang mental kag pisikal nga kaayuhan.
Santo sa datos, may yara na sang 102 ka mga teen centers ang gintukod sa mga sekondarya nga buluthuan sa probinsya. Dugang pa, nag-pain ang gobyerno probinsyal sang pondo nga P300,000 sa pagbakal sang mga gamit ukon recreational materials.
“The province of Iloilo takes pride in having the first and the highest number of teen centers established in the whole country,” pahayag ni Provincial Population Officer Atty. Ruel Von Superio.
Ginsuguran man sang gobyerno probinsyal ang pagtukod sang 10 ka stand-alone teen center buildings sa sekondarya nga mga buluthuan kag ginkilala bilang Teen Center 2.0 infrastructure project. Nagabalor sa P3.5 million ang presyo sang kada estraktura.
Suno kay Superio, magadugang sang 10 ka mga teen center buildings ang pagapatindog sa probinsya nga magahatag pagtamod sa reproductive health kag mental needs sang mga pamatan-on.
Sa bahin ni Gov. Arthur Defensor Jr., iya ginpaalintun ang paghatag sang kahulugan sang gobyerno probinsyal tuhoy sa social kag psychological nga kaayuhan sang mga pamatan-on lakip man ang edukasyon.
“Our teen centers are evolving to become the youth development centers in our secondary schools,” sambit ni Defensor.
Gindisenyo man ang teen center facility para sa pagpasanyog sang career guidance and counseling program kag voter’s education program sa idalom sang programa nga Bulig Eskwela sang Probinsya (BES Probins). (AAL/LMLE/PIA Iloilo with reports from Capitol)
