SAN JOSE, Antique (PIA) — Temprano nga pag-agto sa doctor kag kumpleto nga pagpabulong ang ginakonsiderar nga paraagyan para sa madali nga pag-ayad sa sakit nga tuberculosis ukon TB.
Suno kay Pulmonary Medicine Specialist Helarose M. Elisterio sa sangka hinun-anon kaimaw ang mga mamamahayag, bahul gid ang tsansa ka sangka pasyente nga mag-ayad sa sakit nga TB kun dya temprano pa na diskubrehan kag kumpleto ang pagbulong suno sa ginatalana ka doktor.
Bilang miyembro kang Philippine College of Chest Physicians (PCCP) kag Antique Medical Society (AMS), ginbalita ni Elisterio nga kang 2023, may 10.8 milyon nga katawhan sa bilog nga kalibutan ang may sakit nga TB.
Ridya sa probinsya kang Antique, ang TB ikawalo nga nangin kawsa kang pagmasakit kang katawhan kag ika-siyam nga rason kang kamatayun kang tuig 2024.
Ana man ginpaathag nga ang mga tawo nga mahina ang resistensya parehas kang naga-chemotherapy, hemodialysis, diabetics, nagasuprer kang malnutritisyon, kag mga kabataan ginkilala nga sektor nga madali malatunan kadyang balatian.
Ginreport man nga ang TB nangin kawsa man kang kamatayun kang raku nga katawhan nga may HIV (Human Immunodeficiency Virus) sa bilog nga kalibutan.
Pero ginpasiguro man ni Elisterio nga sa temprano kag kumpleto nga pagbulong, maga-ayad gid ang pasyente.
Gani, ana gid ginahinyo ang tanan nga nagasuspetsa nga nalatunan kang amo nga sakit nga magpabulong sa pinakamarapit nga health facility ukon hospital tungud ang gobyerno may libre nga bulong sa dya nga sakit. (AGP/PSM/PIA Antique)
