CAMIGUIN (PIA) — Ang Technical Education and Skills Development Authority (TESDA) Camiguin Provincial Office naglunsad og serye sa Training Induction Programs (TIPs) aron masugdan ang bag-ong mga kurso sa kahanas para sa mga gustong mahimong elektrisyan, drayber, ug cook ilalom sa Special Training for Employment Program (STEP).
Kaniadtong Oktubre 24, ang TESDA Camiguin Provincial Office, kauban ang Camiguin Polytechnic State College (CPSC), nag-host sa TIP sa kampus sa Camiguin Polytechnic State College (CPSC) aron sugdan ang Electrical Installation and Maintenance NC II nga kurso.
“The TIP welcomed 25 participants who gathered from across the province to embark on their skill-development journey,” matod ni TESDA Camiguin Provincial Director Mohaisen R. Manalao.
(Ang TIP midawat og 25 ka partisipante nga nagtapok gikan sa lain-laing bahin sa lalawigan aron mapalambo ang ilang kahanas.)
Ang CPSC, nga gipangulohan ni Propesor Reynaldo F. Margelino, usa ka importante nga kauban sa paghatag og mga pasilidad ug kagamitan sa training nga kinahanglanon aron magmalampuson ang programa.
Sa susamang inisyatibo, ang TESDA Camiguin nagpatuman usab og TIP kaniadtong Oktubre 14, nga gipahigayon sa Camiguin School of Arts and Trades (CSAT) alang sa mga kurso nga Driving NC II ug Cookery NC II.
“The TIP welcomed 49 participants—25 for Driving NC II and 24 for Cookery NC II—who gathered from across the province to embark on their skill-development journey,” ingon ni Manalao.
(Ang TIP midawat og 49 ka partisipante—25 alang sa Driving NC II ug 24 alang sa Cookery NC II—nga nagtapok gikan sa lain-laing bahin sa lalawigan aron magsugod sa pagpalambo sa kahanas.)
Ang maong event, nga gipahigayon sa CSAT, gidumala nila ni Manalao ug Supervising TESD Specialist Amores, uban sa CSAT Vocational School Administrator nga si Karol Sanggomay P. Ranalan.
Gipasiugda ni Manalao nga kini nga mga programa nagtumong sa paghatag sa mga partisipante og kahanas nga adunay kalabutan sa industriya, aron mapalambo ang ilang kahanas sa pagpanarbaho ug makahatag og positibong kontribusyon sa ilang mga komunidad.
Iyang gidugang nga ang TESDA Camiguin nagpadayon sa pag-invest sa mga inisyatibo sa pag-develop og kahanas, nga nag-ila sa dako nga epekto sa mga programa niini sa lokal nga puwersa sa trabaho.
Ang STEP naghatag og espesyal nga training alang sa mga partisipante, nga nagpalambo sa ilang kahanas sa pagpanarbaho ug nag-uban sa mga padayon nga paningkamot sa lalawigan aron masuportahan ang ekonomikanhong paglambo ug pag-uswag sa kahanas. (TESDA Camiguin/PIA-10/Camiguin)
