SYUDAD SANG ILOILO (PIA) – Gin-anunsyo sang Iloilo Festival Foundation Inc. (IFFI) ang paglunsar sang online ticket sales para sa paalabuton nga 2025 Dinagyang Festival.
Ini ang una nga tion sa maragtas sang Dinagyang Festival nga ang mga tiket mahimo mabakal online, kun sa diin ini mas makapadasig sang sistema sang pagbaligya sang tickets.
Nagumpisa na sang Disyembre 16, 2024 ang pagbaligya sang tickets online kun sa diin pwede ini mabakal sang mga turista sa ginlunsar nga website nga dinagyangtickets.com.
Ang online ticketing system nagapahanugot sa mga bumalakal nga magpili sang ila nga pwesto sa mga judging area nga Quezon-Ledesma ukon Mabini-Delgado; kag magbakal sang tubtob 10 ka tickets kada transaksyon.
Ang tagsa ka entablado ginhatagan sang 1,000 ka tickets kag ginasiguro man ang patas nga pagpanagtag sa mga nagtambong.
“This simplifies the process for everyone, especially those outside the city, balikbayans, or the foreigners, who can now easily purchase tickets online,” pahayag ni Joyce Ann Clavecillas, Executive Director sang IFFI.
Ginsiguro man sang Pabalhas, ang grupo sa likod sang website, nga mabakod ang sistema sang ticketing website para sa Dinagyang Festival kag sarang makauyat sang mataas nga demand.
Ang tickets para sa Dinagyang Festival nga natalana sa Enero 26, 2025 ang nagabalor sang P2,500 para sa Gold Tier kag P2,000 para sa Silver Tier.
Ang Kasadyahan Festival, nga natalana sa Enero 25, 2025, nagatanyag naman sang tickets nga nagabalor P1,200 para sa Gold Tier kag P700 para sa Silver Tier
Suno naman kay Atty. Fydah Marie Sabando, miyembro sang Stage Management Committee, indi magnubo sa 2,400 ka mga pulungkuan sa Freedom Grandstand ang ginpain para sa mga tiglawas sang gobyerno sang syudad, mga sponsor sang IFFI, kag mga imbitado nga bisita. (AAL/JNH/PIA Iloilo)
