SYUDAD SANG ILOILO (PIA) – Temprano pa nga naubos ang mga tiket para sa ginalauman nga showcase of cultural performances sa sini nga tuig nga paindis-indis sang Dinagyang Tribes competition nga natalana sa Enero 26, 2025.
Ginkumpirmar sang Iloilo Festivals Foundation Inc. (IFFI) sang Enero 8 nga ubos na ang tickets kun sa diin kapin sa 2,000 ka mga tiket ang ila gintanyag sa publiko sugod sang Disyembre 15, 2024 para sa duha ka judging areas, nga amo ang Quezon-Ledesma kag Mabini-Delgado.
Subong nga tuig, ginlunsar sang IFFI ang online ticketing system nga mahimo ma-access paagi sa dinagyangtickets.com para sa Dinagyang Festival, nga nagahatag sa mga tawo sang mas mahapos nga access sa pagsiguro sang ila mga pwesto sa tion sang paindis-indis. Ini ang nag-amot sa temprano nga pagkaubos sang mga tiket para sa Dinagyang Tribes kompetisyon.
Ang tiket para sa paindis-indis sang Dinagyang Tribes naglab-ot sa P2,000 para sa silver tier tubtob P2,500 para sa gold tier.
Samtang wala na sang available nga tickets para Dinagyang Tribes competition, ginpahayag naman sang IFFI nga sarang pa nga mabakal sang mga turista ang nabilin nga tickets para sa Kasadyahan sa Kabanwahanan competition sa Enero 25 nga may presyo nga nagalab-ot sa P700 (Silver Tier) kag P1,200 (Gold Tier).
Ang Kasadyahan sa Kabanwahanan competition ang hiwaton isa ka adlaw antis ang Dinagyang Tribes competition. Ini ang ginpasakopan sang nagkalain-lain nga mga banwa sa probinsya sang Iloilo nga nagapakita sang ila kaugalingon nga mga lokal nga kapistahan, nga nagapakita man sang ila pinasahi nga kultura kag tradisyon.
Ginhatagan pagtamod sang IFFI nga ang tanan nga pagbaligya sang tiket para sa duha ka kahiwatan pinal kag indi na mabalik pa bangud may QR code nga ginapadala sa mga email sang mga bumalakal nga dapat nila ipresentar upod ang isa ka valid ID sa pagsulod sa tion sang kahiwatan.
Samtang, magluwas sa duha ka nasambit nga judging areas para sa mga events, nagreserba man ang Iloilo City government sang 2,400 ka pulungkuan sa Freedom Grandstand para sa mga tiglawas, sponsors, kag invited guests sang city government; samtang ang kaangay nga reserved seats sa Capitol area ang pagadumalahan sang Iloilo Provincial government.
May walo ka mga tribu ang magapasakop sa Dinagyang Tribes competition subong nga tuig, nga ginalakipan sang defending champion nga Tribu Pan-ay sang Fort San Pedro National High School, Tribu Paghidaet (La Paz NHS), Tribu Salognon (Jaro NHS), Tribu Parianon (Iloilo City NHS), Tribu Ilonganon (Jalandoni Memorial NHS), Tribu Hangaway (Graciano Lopez Jaena ES), Tribu Pag-asa kang Manduryaw (Mandurriao NHS), kag Tribu Molave (Barangay San Rafael, Mandurriao).
Samtang, may siyam ka mga kabanwahanan naman ang magapasakop sa Kasadyahan nga ginalakipan sang Cabatuan (Tinuom Festival); Leon (Kaing Festival); Maasin (Tultugan Festival); Igbaras (Tangyan Festival); Anilao (Banaag Festival); New Lucena (Cry of Jelicuon Festival); kag San Rafael (Tawili Festival). (AAL/JNH/PIA Iloilo)
