SYUDAD SANG ILOILO (PIA) — Ginlunsar sang gobyerno probinsyal ang Tiendas Ilonggas trade fair sa Kapitolyo kabahin sang pagsaulog sang National Women’s Month.
Ginahatagan pagtamod sang trade fair ang mga talento kag ikasarang sa pagnegosyo sang mga Ilongga kasubong sang paghimo sang nagkalainlain nga mga produkto pareho sang hablon, pagkaon, basket nga gin-rara, kag accessories.
Suno kay Gov. Arthur Defensor, Jr., luyag sang gobyerno probinsyal nga makigbahin ang mga kababainhan sa pag-uswag.
“We look forward to strengthening our partnership upod ang mga kababaihan, ” pahayag ni Defensor.
Dugang pa, ang ini nga inisyatibo nga gin-organisar sang Provincial Local Economic Development and Investment Promotions Office (LEDIP Center Iloilo Province) nagahatag plataporma nga mas makapasanyog sang negosyo sang mga kababainhan kag nagapakita man sang suporta sang gobyerno probinsyal pinaagi sa paghatag sang nagakaigo nga kahigayanon para sa ila.
Para kay Delia Hablo sang Estancia, ang pagpasakop sa trade fair nangin paalagyan agud mabaligya ang mga produkto nga uga.
“Kun tawgan ako sang Capitol nagatipon naman ako na sang akon dalal-on. Amo ina ang akon nga pangabuhi,” pakigbahin ni Hablo.
Nagpasalamat man si Hablo sang kahigayonan nga kun sa diin ini ang makabulig sa iya nga palangabuhian.
Ang paghiwat sang National Women’s Month ang naangot sa subtheme nga, “Babae sa Lahat ng Sektor, Aangat ang Bukas sa Bagong Pilipinas,” nga kabahin sang Republic Act 9710, ukon ang Magna Carta sang mga Kababainhan. (AAL/LMLE/PIA Iloilo)
