SAN JOSE, Antique (PIA) — Ang banwa kang Tobias Fornier nga kauna anay ginatawag munisipalidad kang Dao nagapanghanda sa paghiwat kang Sambayang Festival sa Pebrero 20-22, 2025.
Sa tema nga “Padayon sa Pagtib-ong kang Pinasahi nga Kultura kag Tradisyon nga Daonhon,” dya nagatuyo sa pagpakita kang manami, madinuagun, kag makahulagan nga talento, personalidad kang pagbuligay kang mga Daonhun.
Suno kay municipal information officer Reggie Labnao, kang mga nagriligad nga tinuig dya ginatawag nga Panaet Tarambayaw Sambayang Festival nga nagakahulugan kang pagdayaw, paghalad kag pagpasalamat sa bugana nga ani kag grasya sa bilog nga tuig paagi man sa pagbuligay kang mga katawhan.
Para sa mga Daonhun, ang paghalad ginalakipan kang mga manami nga produkto kang anda kaumahan kag kadagatan nga may lakip nga pagsinadya.
Ang Sambayang naghalin sa mga tinaga nga “samba” kag “dagyang” nga nagakahulugan kang pagdayaw sa mga espiritu kag kamal-aman nga may pagsinadya.
Ang selebrasyon magaumpisa sa Pebrero 14, 2025 paagi sa pagpakilala kang Lin-ay kang Tobias Fornier 2025.
Sa amo nga adlaw pagabuksan man ang Food Festival nga magapakita kang mga pagkaon, patubas, kag mga produkto halin sa banwa.
May pagahiwatun man nga Grand Parade sa 5:00 sa hapon sa Pebrero 20 para sa pormal nga pagbukas kang Sambayang Festival.
Samtang, pagahiwaton man ang Lin-ay kang Tobias Fornier pageant night sa Pebrero 21 kag 22 sa gab-i.
Gina-imbitar gid kang mga opisyales kang Tobias Fornier ang mga turista kag lokal nga pumuluyo sa pagsaksi kadyang masadya nga hitabo. (AGP/PSM//PIA Antique/ Tobias Fornier LGU)