NUNUNGAN, Lanao del Norte (PIA) — Usa ka simbolo sa kultura sa mga Maranao ang nagbarug karon sa Barangay Pantar niining lungsod, human gipasiugdahan sa provincial government ang pagturn-over sa bag-ong natukod nga Torogan project.
Gipondohan kini og P5.49 milyon sa provincial government aron mapalig-on ang lokal nga turismo.
Ang Torogan usa ka pre-kolonyal nga tradisyonal nga balay sa mga Maranao ug pinuy-anan sa mga sultan ug lideres. Aduna kini’y Okir nga disenyo nga nagpakita sa kahanas sa Maranao sa pag-ukit.
Makita ang maong proyekto duol sa Mt. Inayawan Range Natural Park, nga karon giila isip ika-53 nga ASEAN Heritage Park ug ika-11 sa Pilipinas.
Sumala ni Provincial Board Member Grecille Matalines, ang proyekto magpalig-on sa kultura ug tradisyon sa Nunungan.
“Dako kaayo kini nga achievement. Looking forward, makita nato na ang Torogan, nagpakita sa unity ug peace, nga ato jud ikultibar kanunay nato nga buhaton para sa kinatibuk-an og ingon man sa development,” matud niya.
Busa mapasalamaton si Nunungan Mayor Marcos Mamay tungod kay dakong tabang ang proyekto sa pagpreserbar sa kultura, ug pagpalambo sa lokal nga negosyo, ug turismo sa ilang lungsod.
“Sa Torogan natin, sa loob niyan, magkakaroon tayo ng pasalubong center kung saan ilalagay natin lahat ng produkto mula sa municipality of Nunungan upang ma-showcase kung ano ang meron sa ating bayan. May part din doon na lalagyan ng museum, knowing for a fact na mayaman sa culture ang municipality ng Nunungan,” sumala niya.
Samtang, mipahayag sa iyang kalipay si Laog Rajamuda, usa ka residente sa Barangay Pantar.
“Nindot kaayo ni. Nagpasalamat mi kay naa ni nga proyekto diri sa Nunungan. Magamit namo ning Torogan kung magtigom-tigom ang mga tao,” sumala niya.
Ang lokal nga panggamhanan sa Nunungan maoy manguna sa pagdumala sa Torogan ug mosiguro sa kalampusan niini pinaagi sa bulanang pagmonitor sa mga turista ug community-driven initiatives. (LELA/PIA-10/Lanao del Norte)
