SYUDAD SANG ILOILO (PIA) — Nabalhag ang pagsaka sang tourism market kag obra sa Western Visayas nga naga-amot sa pagpasanyog sang industriya sa bug-os nga pungsod.
Suno sa Department of Tourism (DOT) 6 sa ginpatigayon nga Kapihan sa Bagong Pilipinas (KBP), Marso 7, ang tourism market sa Pilipinas amo ang pinakadako sa Southeast Asia, nga nagabalor 66.2 bilyon US dollars base sa World Travel and Tourism Council report sang 2024.
Kaangot diri, ang rehiyon nakarekord man sang P74 bilyon nga tourism receipts gikan sa kabug-osan nga 5.9 milyon nga tourist arrivals suno sa rehiyonal nga distribusyon sang overnight traveler reports nga ginsumite sang mga lokal nga panguluhan. Ang ini nga numero nagapakita sang 10.25 porsyento nga pagtaas sang tourist arrivals nga yara lang sa 5.36 milyon sang tuig 2023.
Sang ang pungsod nagbaton sang masobra 5.9 milyon nga internasyonal nga mga bisita sang 2024, ini nakalikom sang P760 bilyon nga kita ukon 126 porsyento nga recovery gikan sa 2019 pre-pandemic levels.
Ginpahayag man sang DOT ang tourist arrivals sa tagsa ka probinsya kag ang porsyento sang ila kontribusyon sa kabug-osan nga rehiyonal nga tourist arrivals.
Ang mga probinsya kag highly urbanized cities sa Western Visayas nakalab-ot sang mataas nga growth rate kon sa diin ang Capiz nakatala sang 43.73 porsyento nga pagtaas gikan sa datos sang 2023, kag ang Iloilo City nakalampas sa isa ka milyon nga marka sa tourist arrivals.
“Tourists are staying longer, now averaging 11 nights compared to 9 in 2019, and spending more, with an average of 2,073 US dollars per visit – clear indicators of a deeper connection with our people, our culture, and our destinations,” siling ni Crisanta Marlene P. Rodriguez, Regional Director sang DOT 6.
Dugang pa ni Rodriguez, ang DOT nagapangako man nga maghatag sang mga maayo nga obra sa bug-os nga pungsod.
Gani, sa bahin sang employment, ang Labor Force Survey nagpakita nga tubtob Abril 2024, 16.4 milyon nga mga Pilipino ukon 34 porsyento sang total employment nakabenepisyo sang direkta ukon indi direkta gikan sa sektor.
Sa kaangay man nga survey, nagapanglima ang Western Visayas sa bahin sang tourism employment listing nga may yara sumatutal nga 1.07 milyon nga mga empleyado.
“These achievements stem from strategic initiatives championed by the DOT, focused on innovation, inclusivity, and sustainability. I extend my deepest gratitude to everyone, both in the public and private sectors, who has contributed to the inclusive growth of the industry. Your dedication has elevated tourism as a vital socio-economic driver, creating more opportunities, especially for marginalized groups,” pahayag ni Rodriguez. (AAL/AGP/ PIA 6)
