TAGBILARAN CITY, Bohol (PIA) — Gitugyan sa Department of Agriculture-Central Visayas (DA7), niining bag-o lang ang usa ka trading post ngadto sa local nga kagamhanan sa Getafe, Bohol.
Ang maong proyekto gipundohan pinaagi sa espesyal nga alokasyon ni kanhi Kongresista sa Segundo Distrito Erico Aristotle Aumentado, kinsa mao nay gobernador karon sa lalawigan.
Ang pagtugyan gipangulohan ni DA7 regional technical director, Engr. Cirilo Namoc, nga nagrepresentar ni Regional Executive Director Angel C. Enriquez.
Sa iyang mensahe, gipaambit ni Director Namoc ang kamahinungdanon sa usa ka trading post nga makatabang sa pagpalambo sa lokal nga sektor sa agrikultura.
“Kaning trading post maghatag sa atong mga farmers ug fisherfolk og usa ka lugar diin dili na sila maglisod sa pabaligya sa ilang produkto,” matud pa ni Namoc.
Gidasig usab niya ang mga mag-uuma ug mangingisda nga magparehistro sa Registry System for Basic Sectors in Agriculture (RSBSA) ug magtukod og kooperatiba o grupo aron mapalig-on ang ilang kolektibong tingog ug makakuha og dugang suporta gikan sa gobyerno.
Gihangop ni Getafe Mayor Cary M. Camacho ang maong kalambuan ug nagpahayag sa iyang pasalamat ug pasalig sa pagmentinar sa maong pasilidad.
“Kini nga proyekto dako kaayo ning tabang para sa atong mang-uma ug mangisdaay, ug sa kumunidad,” matud pa ni Camacho.
Gipasalig usab sa mayor nga suportahan sa munisipyo ang tanang mga aktibidad ug programa sa DA7.
Ang maong aktibidad gitambongan usab sa DA7 Agricultural Program Coordinating Officer sa Bohol Roman Dabalos, Municipal Agriculturist Jonas T. Luega, ug lain-laing Sangguniang Members gikan sa Getafe.
Ang susamang proyekto gitukod usab sa lima ka mga lungsod nga naglakip sa Clarin, Sagbayan, San Miguel, Talibon, ug Carlos P. Garcia. (ECB/PIA7-Bohol)
