SYUDAD SANG ILOILO (PIA) — Malapit sa 800 nga mga indibidwal nagikan sa nagkalainlain nga mga ahensya sang gobyerno, lokal nga panguluhan, kag pribado nga sektor ang nagpasakop sa ginhiwat nga “tree growing for a cause” nga ginpangunahan sang Civil Service Commission (CSC) 6 kaupod ang Department of Environment and Natural Resources (DENR) 6.
Suno kay CSC regional director Nelson Sarmiento, dako nga bulig ang pagtanom sang mangrove ilabi na sa pag-amlig sang palibot batok sa baha, soil erosion, kag tsunami.
“What we are doing is a big contribution to the enviornment, ” sambit ni Sarmiento sa iya nga mensahe.
Ginpakigbahin man ni Sarmiento nga ang registration fee sa aktibidad ang igahatag sa pamilya sang mga mamumugon sa gobyerno nga nagtaliwan kaangot sa paghatag serbisyo sa gobyerno.
“Every year, may ginahatagan kita nga bulig nga mga, unfortunately, ang mga upod naton sa gobyerno nga napatay in the line of duty. Although, each agency has its own way of helping out, nagahimo man kta pamaaagi nga makabulig kahit hindi man dako nga amount,” pahayag ni Sarmiento.
Ang paghiwat sang ini nga aktibidad ang naangot sa 124th Philippine Civil Service Anniversary (PCSA) kag naga-highlight sang kahulugan sang tayuyon nga mga panikasog sa palibot kag pagdumala sang dunang manggad. (AAL/LMLE/PIA Iloilo)
