SYUDAD SANG ILOILO (PIA) – Gin-engganyo ni Mayor Jerry P. Treñas ang publiko nga maghimo sang proactive measures agud masiguro ang ila ikaayong lawas kag kaayuhan sa tunga sang nagataas nga temperatura sa syudad.
Ginpahayag ni Treñas nga nakaalerto ang response team sang syudad agud nga ang mga mobility assets kag mga suplay medikal madali nga magamit sa pagsabat sa posible nga mga emerhensya.
Gin-engganyo man sang lokal nga panguluhan sang syudad ang mga pumuluyo nga magsunod sa ginarekomendar nga mga tikang sa kaluwasan, nga nagalakip sang pagpabilin nga hydrated, paglikaw sa malawig nga exposure sa init, kag pagsuksok sang nagakaigo nga panapton agud mapahaganhagan ang risgo sang heat exhaustion kag heatstroke.
Ang Regional Disaster Risk Reduction and Management Council (RDRRMC) Region VI, sa koordinasyon sang DOST-PAGASA kag Department of Health nagpagwa sang advisories nga nagapakita sang kinahanglan nga mga preparasyon bilang sabat sa ginalauman nga tuman nga kainit sang panahon.
Ang DOST-PAGASA Heat Index Forecast sang Marso 13 nagapakita nga ang maximum heat index sa syudad sang Iloilo ang gina forecast sa 40°C.
Kaupod sini, ginpahayag ni Treñas nga padayon nga ginabantayan sang Iloilo City Disaster Risk Reduction and Management Office kag operations center ang sitwasyon kag magahatag sang regular nga update agud masiguro ang kaluwasan sang publiko.
“Let us all remain vigilant and take care of each other to safeguard the health and well-being of the Ilonggos during this period of extreme heat. For any concerns or emergencies, please reach out to your operations center or health center. Let’s stay safe, hydrated, and resilient,” siling ni Treñas. (AAL/JNH/PIA Iloilo)
