SYUDAD SANG ILOILO (PIA) – Ang Kasadyahan sa Kabanwahanan liwat nga nagtipon sang linibo ka mga turista agud masaksihan ang masinadyahon kag makawiwili nga mga pasundayag sang siyam ka mga tribu nga nagapakita man sang nagkalain-lain nga mga tradisyon kag kultura sang mga banwa sa Iloilo.
Liwat nga nakuha sang Tultugan Festival sang Maasin, Iloilo ang kampyeonato matapos ang manami sini nga performance nga nagapakita sang masanyog nga industriya sang kawayan sang banwa. Nakabaton man ang grupo sang P1.2 milyones nga cash prize.
Ang tultugan isa ka instrumento nga human sa kawayan nga ginagamit sang mga tumandok sang una para sa komunikasyon kag bilang isa ka instrumento sa musika. Naghalin man in isa tinaga nga “tultog”, nga isa ka aksyon nga nagahambal sang akto sang pagtokar sang tunog sa kawayan.
Nakuha man sang Tultugan Festival ang pila ka special awards, kaangay sang Best in Music, Best in Production Design, Best in Choreography, kag Best in Performance.
Gindeklarar naman nga first runner-up ang Hirinugyaw-Suguidanonay Festival sang Calinog, Iloilo nga nakabaton sang P700,000, samtang P500,000 naman ang nakuha sang Kaing Festival sang Leon, Iloilo bilang second runner-up.
Sa pihak nga bahin, ang anum ka mga tribo nga wala nagdaog, nga ginalakipan sang Tinu-om Festival sang Cabatuan, Tangyan Festival sang Igbaras, Banaag Festival sang Anilao, Cry of Jelicuon sang New Lucena, Tawili Festival sang San Rafael, kag Haw-as Festival sang Dumanggas nakabaton sang tig P200,000 nga consolation prize.
Samtang, sa mensahe ni Gov. Arthur Defensor Jr., iya ginpasalamatan ang tanan nga mga indibidwal kag organisasyon nga nagbulig agud mangin madinalag-on ang paghiwat sang Kasadyahan sa Kabanwahanan nga parte man sang selebrasyon sang Dinagyang Festival 2025.
“It was a good promotion of our fun, foodie, friendly Iloilo province. Congratulations, and we will continue to develop the festival so that it becomes a better cultural stage for the province and city of Iloilo,” dugang pa ni Defensor. (AAL/JNH/PIA Iloilo)
