DIPOLOG CITY, February 15, 2023 – Malipayon ang 33 ka magti-ayon sa dihang nahimong legal ang ilang panag-ipon human sila gikasal ni Mayor Darel Dexter T. Uy. Kini human gipahigayon ang “Twogether Forever” mass wedding didto sa Atrium, Top Plaza Hotel ning siyudad kagahapong adlawa, Pebrero 14 ning tuiga.
Isip solemnizing officer sa nasangpit nga kalihukan, si Mayor Uy ang mitambag sa mga magti-ayon nga ipatig-babaw gayod ang gugma ug pagpasensiya sa usa’g-usa aron dunay kalinaw sa pamilya, uban na sa pagpahimutang sa atong Dios dinha sa sentro niini. Samtang nanghinaot usab si Ms. Rosemarie P. Miranda, hepe sa buhatan sa City Civil Registrar (CCR), nga mahimong mabungahon ug malipayon ang kaminyu-on sa 33 ka parisan sa umaabot nga mga tuig.
Unang gipahigayon sa nasangpit nga kalihukan mao ang Wedding Processional sa 33 ka parisan diin dungan niini gipresentar usab ang usa ka Audio Visual Presentation sa photo shoot sa mga kaslonon. Gisunod dayon ang pag-ampo nga gipangulohan ni konsehal Praxides P. Rubia ingon man ang pagbasa sa bala-ang kasulatan. Human niini mao ang seremonya sa kasal nga gipahigayon ni Mayor Uy, duyog sa pagsaksi sa mga abay (ninong ug ninang) ug ubang mga bisita.
Nahimong mabulokan ang maong aktibidad tungod usab sa pagpahigayon sa tradisyonal nga couple dance, wine toasting ug cake sharing. Ang mga kinasal nakadawat usab ug cake, bible, food packs ug regalo gikan ni Mayor Uy.
Ang “Twogether Forever”, Kasalan nga Bayan maoy usa ka tinuig nga kalihukan sa kagamhanang lokal sa Dipolog, pinaagi sa buhatan sa CCR, sukad pa sa administrasyon ni Mayor Evelyn T. Uy, 13 ka tuig na ang nakalabay ug gipadayon usab sa kasamtangang pamunoan ni Mayor Darel Uy.
Ang nahisgutang kalihokan ang gipangunahan sa buhatan sa City Civil Registrar ilawom sa pagdumala ni City Civil Registrar, Ms. Rosemarie P. Miranda duyog na sa koordinasyon sa pipila ka buhatan sa Lokal nga Kagamhanan ning siyudad, sama sa City Information Office, City General Services Office, City Tourism, MITO, POPCOM, Philippine Statistics Authority (PSA), uban sa pipila ka mga personalidad gikan sa media, tanan ning siyudad. (cio-Ltd)
