SYUDAD SANG ILOILO (PIA) — Sa pagtakop sang selebrasyon sa ila ika-25 nga anibersaryo, ginpasidunggan sang Ugsad Regional Gender Resource Network Western Visayas ang ila mga partners sang Disyembre 11 sa University of the Philippines Visayas Iloilo Campus.
Nagkalainlain nga partner agencies, institusyon, kag non-government organizations ang ginkilala bangud sa ila halangdon nga kontribusyon sa pagpalab-ot sang mga gender-responsive nga programa kag serbisyo sa rehiyon.
Sa iya mensahe, gindayaw ni UP Visayas Chancellor Dr. Clement C. Camposano ang mga myembro sang UGSAD sa paglab-ot sa 25 ka tuig nga nagapakita lamang sang mabakod nga pagbinuligay sang mga myembro sa pagpromotar sang gender and development sa bug-os nga rehiyon.
“Ugsad has tirelessly advocated gender equality and uplifting the lives especially of those in the marginalized sector,” suno kay Camposano.
Sa pihak nga bahin, si GAD focal person sang Bangko Sentral ng Pilipinas Iloilo nga si Hecelyn R. Peren nga naghatag sang pang-ulihi nga mensahe, iya ginsiling nga may malaba pa nga alagyan nga palaabuton, madamo pa ang dapat nga buhaton, kag madamo pa nga mga paghangkat nga dapat dag-on.
“Malayo pa, pero malayo na. All of us, as manifested in our messages of support shall seek always to work in genuine partnership with Ugsad and support its efforts to build this local community as an enabling environment where people with diverse SOGIESC have equal voices and opportunities and where they live life free from discrimination, coercion, violence and stigma,” siling ni Peren.
Nag-umpisa ang selebrasyon sang Nobyembre 28, 2024 paagi sa isa ka parada kag opening program.
Kaangot sa selebrasyon, ang UGSAD nagpatigayon man sang bazaar, exhibit, kag photo contest. (AAL/AGP/PIA 6)
