LIGAN CITY (PIA) — Aron masiguro ang usa ka limpyo, hapsay, ug malinawon nga 2025 National ug Local Elections sa Iligan City, gipahigayon ang Unity Walk, Interfaith Prayer Rally, ug Peace Covenant Signing sa mga kandidato.
Tumong sa kalihokan nga mapaambit sa mga kandidato ang ilang komitment alang sa limpyo, malinawon, ug matinud-anong eleksyon.
Gitambungan kini sa kapin 60 ka mga kandidato kuyog ang ilang mga supporter.
Gipangulohan kini sa Secure, Accurate, and Fair Elections (SAFE) 2025 Core Group sa Iligan, nga gilakipanan sa Commission on Elections (COMELEC), Philippine National Police , Armed Forces of the Philippines, Department of the Interior and Local Government (DILG), Department of Education, Philippine Information Agency, Parish Pastoral Council for Responsible Voting (PPCRV), ug ang Interfaith Group.
“Wala tay laing tumong ani kundi hapsay lamang, orderly ug peaceful ang atong election. And for the candidates, para ma-abide nila ang ilang mga responsibilidad ug obligasyon isip kandidato ngadto sa ilang komunidad ug supporters,” sumala ni COMELEC Iligan Election Officer Lawyer Anna Liza T. Barredo.
Gisiguro sab sa kapulisan ug kasundalohan ang seguridad sa umaabot nga eleksyon.
“So far, maayo man ang atong palibot as of this period, wala ta’y areas of concern, naa ta sa green category, very peaceful so far ang atong Iligan City,” sumala ni PCol. Jerry A. Tambis, Iligan City Police Office Acting City Director.
Mipirma ang SAFE Core Group sa Solidarity Pact Pledge ug mipirma sab ang mga kanditato sa Integrity Pledge.
Nagkahiusa sab ang tanan sa pag-kanta sa “Let there be peace on earth” ug dayon gibuhian ang mga kalapati sa SAFE Core Group, nga nagrepresenta sa paghiusa ug paglaum alang sa usa ka hapsay ug malinawon nga eleksyon. (LELA/PIA-10/Lanao del Norte)
