TAGBILARAN CITY, Bohol, Jan. 11 (PIA) — Dili una ipatuman sa Philippine Health Insurance Corporation (PHILHealth) ang pagpa-usbaw sa premium contributions subay sa nakatala nga kadak-on sa kita sa mga sakop niini niining tuiga.
Nunot niini, suspendido usab ang pagpatuman sa mas mapadaku unta nga benepisyo, dala sa pagtaas sa premiums.
KIni maoy unod sa hiniusang pamahayag nga giluwatan sa PhilHealth ug sa Department of Health (DOH) kabahin sa pagsuspenso usab subay sa mandu sa Buhatan sa Presidente nga ipaoktaba ina ang pagtaas sa premium rates ug income ceilings alang sa tuig 2023, base usab sa Section 10 sa Republic Act 11223.
Segun sa Section 10 sa RA 11223 o ang Implementing Rules and Regulations sa Universal Health Care Law, angay ipatuman ang permiums sa mga sakop subay sa income ceilings sukad niadtong 2019.
Sa nahisgutang balaod, alang sa 2023, ang premium contributions sa mga nagsweldo og sobra sa P40 Mil ang buwan, anaa na sa 4.5% gikan sa 4.0% nga gipatuman unta sa 2022.
Ang premium contribution sa mga sakop nga gikolekta sa PhilHealth, mao usab ang gamiton sa mga programang gipalapdan ilabi na sa pagpadaku pa sa mga benepisyo sa mga ma-ospital, subay sa Universal Health Care Law.
Ang pagpasaka sa mga contribution premiums, gipahaum usab sa pagpasaka sa mga benepisyo nga makuha sa mga sakop niini pinaagi sa tinuig nga roll-outs.
Sa ilang hiniusang pamahayag, miangkon ang PhilHealth og DOH nga ang pagsuspenso sa contribution premiums gilantaw usab nga makatabang sa mga katawhan nga maga-sugakod sa padayon pang nagsaka nga presyo sa mga nag-unang paliton ug panginahanglanon dungan sa nagpadayon nga inflation.
Ang susama nga moratorium sa pagsaka sa contribution premiums, nahitabo na usab niadto’ng 2020 ug 2021, subay usab sa mandu sa Buhatan sa Presidente, kinisa naglantaw usab sa nagpadayon pang epekto sa pandemya. (RAHC/PIA7 Bohol)
