PANGLAO, Bohol (PIA) — Pormal na nga gisirad-an ang tanang kalihukan sa kadagatan sa palibut sa Puntod Island, ilabi na puti nga mga sandbar sa Virgin Island, hangtud mapiho na sa Department of Environment and Natural Resources (DENR) nga napahimutang na ang mga pamaagi aron mapaugmad ang pagpanalipud ug pagpatunhay sa kahinguhaan sa Panglao Island Protected Seascapes (PIPS).
Gipabarug sa mga reef rangers sa DENR, ang usa ka abiso sa pagsira, mga alas 2:00 sa palis, Septembre 9, 2023, samtang gisaad nila nga ipabarug usab ang lain pang abiso sa pagsira didto sa main entrance sa Virgin Island Sandbar nga iya sa isla Puntod.
Ang mga reef rangers sa DENR PIPS, maoy natahasan sa pagbantay sa Puntod Island ug silingan nga Gak-ang Island, aron segurohon nga mapanalipdan kini.
Ang pagsira, nahukman human nga irekomendar sa Protected Areas Management Board (PAMB) sa PIPS, dala sa wala na mabantayi nga pagpanamastamas sa mga gasang didto sa Estaca snorkeling site, mga usa ka kilometro ang kalayoon gikan sa Puntod, apan nasulod pa sa PIPS.
Usa ka post sa social media ang nakapakita sa mga table corals o gasang nga gisuwatan og pangalan sa mga turista, nga miresulta sa pagpangapuka ug pagpangabali sa mga tudlo sa gasang, nga gituohang maoy ikamatay niini.
Dihadiha dayun, mingmandu si Gob Erico Aristotle Aumentado sa reef assessment aron tinuon ang kadaut nga nahitabo.
Sa iyang nakita, una na nga mipalubad ang gobernador nga iyang ipasira ang Puntod ug silingan nga mga Lugar, sulod sa PIPS aron, hatagan ang kalikopan sa higayon nga makapahiuli ug aron mapahimutang sa DENR ang tukmang mga regulasyon alang sa pagpanalipud sa 24 kilometro kwadrado nga gipanalipdang kadagatan ug kabaybayonan, kon mabuksan man ugaling og balik.
Nakit-an usab sa reef assessment team nga walay lugar nga kahiktan sa mga bangka nga maghatud og mga turista didto, rason nga bisan asa na lang motagak sa pundo ang mga bangkero.
Kini maoy lain nga rason nga manga-lukat ang mga gasang nga ma-igo sa angkla.
Gideklara sa DENR human sa tigum sa PAMB kauban ang mga opisyales sa DENR, Department of Tourism, ug sa mga local nga stakeholders, ang pagsira sa Puntod ug nga silingan nga lugar, sa mga kalihukang pangturismo niadtong mi-aging semana, apan kini sugod sa Sept. 9.
Matud ni Aumentado, uyon ang DENR nga gamiton ang nakobra nga koleksyon sa mga divers ug sa mga mangaligo nga motamak sa Virgin Islands aron makapahimutang sa mga boya ug pataw palibut sa mga nadaut nga gasang sa Estaca snorkeling site, ug sa pagpahimutang sa mga boya nga maoy kahiktan sa mga sakayan ug Bangka nga modunggo ug maghatud og mga turista sa isla.
Diha nga gipagawas ang pormal nga abiso sa pagsira sa mga water activities sa PIPS, wala na hinuon iapil sa pagdili ang kasagaran nga pagpanginhas sa mga taga Danao, Panglao, subay sa community resource utilization, ug ang pag-agi sa mga bangka dinhing dapita, paingon sa turismo nag Isla sa Balicasag. (RACH/PIA7 Bohol)
