SYUDAD SANG ROXAS, Capiz (PIA) — Ginpahayag ni Atty. Wil Arceño nga Assistant Regional Election Director subongman Provincial Election Supervisor sang Commission on Elections sa Capiz nga wala na sang extension ang nagapadayon nga voter registration kag magatapos sa Septyembre 30 karon nga tuig.
Kaangot sini, ginapahanumdom sang opisyal sang Comelec ang mga magaparehistro agud makaboto, may plano nga isaylo ang voter registration sa iban nga lugar kag mga maga reactivate sang ila rehistro agud makaboto nga hingalitan ang nabilin nga inadlaw sang voter registration.
Nahibaluan nga bukas ang mga talatapan sang Comelec sa Sabado, Septyembre 28, para sa pag-rehistro sang mga botante para sa Mayo 2025 nga eleksyon.
Ginpanugyan pa ni Arceño nga indi na maghulat pa sang katapusan nga adlaw ukon deadline bangud posible magadagsa ang tawo sa ila mga talatapan kag mahimo indi ma-akomodar ang tanan nga luyag magpa-rehistro.
Nagapati naman si Arceño nga bastante ang ti-on nga ginhatag sang Comelec para sa voter registration nga nagsugod pa sang Pebrero 12, 2024.
Samtang may kapin na sa 524,560 nga rehistrado nga botante ang probinsya base sa Hulyo 2024 nga rekord sang Comelec apang ginalauman pa nga magataas ang numero bangud sang nagapadayon nga voter registration. (AGP/AAL/PIA Capiz)
