SAN JOSE, Antique (PIA) — Ginpatuman ang Walang Gutom Program (WGP) sa banwa kang Bugasong nga may 178 nga benepisyaryo.
Ang WGP sangka sa bag-o nga programa kang Department of Social Welfare and Development (DSWD) nga nagatuyo sa pagbulig sa mga pigado nga pamilya para malikawan ang gutom.
Suno kay Bugasong information officer Richard Francisco, ang dya nga programa nagabulig sa mga pigado nga pamilya paagi sa ginhiwat kang Food Redemption program nga gintambongan kang mga benepisyaro sa Ilaya (AnaKalusugan) Evacuation Center.
Ang tinutuyo kang dya nga lihuk magatugro kang pinansyal nga bulig sa pigado nga pamilya paagi sa Electronic Benefits Transfer ukon EBT card kung sa diin nakalista ang pagkaon nga pwede mabakal sa accredited nga mga tindahan.
Ang listahan ka mga tindahan makita sa https://kiosk.dswd.gov.ph.
Nagpasalamat si MSWDO Ladylove B. Requintina kaimaw kang lokal nga opisyales sa pagdara kang suporta halin sa gobyerno.
Dugang pa, ang dya nga programa nagapadugang kang inspirasyon sa mga may naba nga kita nga nagapursige nga makabawi sa andang adlaw-adlaw nga pagpangabuhi. (AGP/PSM/PIA Antique)
