MALAYBALAY CITY (PIA) – Si re-elected Malaybalay City Mayor Jay Warren R. Pabillaran misaad nga ipadayon sa iyang administrasyon ang Water System Project nga nahimutang sa Barangay Imbayao, ning dakbayan.
Matud niya nga gipundohan kini og P250 million aron mahatagan og solusyon ang problema sa suplay sa tubig.
Atol sa interview, namahayag ang mayor nga nagamit na sa pagtukod sa proyekto ang P150 million, ug gipaabot ang Special Allotment Release Order (SARO) sa Department of Budget and Management aron magamit ang 100 million para bayad sa mga tubo sa tubig.
“Mahuman na ang maong proyekto sunod tuig, ug ang populasyon nga atong gitutokan duna nay plano nga nakahan-ay niini. Mandato gikan sa katawhan sa dakbayan nga makig-alayon ta sa mga pribadong kompanya, sama sa Prime Water ug Water District,” miingon si Pabillaran.
Gi-klaro sa mayor nga kung makaya sa dakbayan, ang syudad sa Malaybalay ang maghimo sa inisyatiba, tungod kay ang tubig usa ka basic nga panginahanglan alang sa kaayohan sa katawhan.
“Maningkamot ang city government sa Malaybalay nga matuman ang pangandoy sa katawhan sa saktong serbisyo ug suplay sa tubig tungod kay pakyas ang sistema sa water distribution sulod sa lima na ka-tuig,” dugang sa mayor.
Namahayag si Pabillaran nga gikinahanglan ang interbensyon sa local government sanglit tubig ang nag-unang panginahanglanon.
“Isip mayor sa Malaybalay City, buhaton nako ang tanan para sa katawhan sa dakbayan kay ang tubig importante kaayo sa atong inadlaw-adlaw nga panginabuhi,” matud sa mayor. (JBA/PIA-10/Bukidnon)
