SYUDAD SANG ILOILO (PIA) – Nagkanari-sari nga mga aktibidad ang ginpatigayon angot sa pagsaulog sang Western Visayas Innovative Startup Fest nga may tinutuyo sa pagpalig-un sang startup ecosystem sa rehiyon.
Ginpangunahan ang kahiwatan sang UMWAD Western Visayas kag Department of Science and Technology (DOST) 6 humalin sang Setyembre 24 tubtob 27 sa syudad sang Iloilo.
Nalakip sa mga kahiwatan nga ginpatigayon amo ang Innovate Startup Conference, Regional ICT Summit and Exhibitions, Slingshot and Moonshot TNK Startup Awarding, pitching workshop, student startup summit, Intellectual Property Convention, kag iban pa.
Para kay DOST 6 regional director Rowen Gelonga, kinahanglan nga masuportaran ang mga startups ukon mga bag-ong tukod nga mga negosyo nga mangin viable business enterprises nga magapasanyog sang palangabuhian kag magagamit sang siyensya, teknolohiya kag inobasyon agud masuportaran ang socio-economic aspirations sang rehiyon.
“It is high time for us to develop our regional ecosystem that encourage the emergence of innovative startups nationwide, most particularly in Western Visayas,” pahayag ni Gelonga sa isa ka press conference.
Dugang pa, ang gobyerno nagahatag sang nagkalain-lain nga sahi sang pagsuporta sa mga startups kasubong sang pagpanalawsaw, funding assistance, kag incubation support.
Sa pihak nga bahin, nagpaalintun man sang suporta ang Philippine Chamber of Commerce and Industry (PCCI)-Iloilo sa kawsa sang DOST.
Suno kay PCCI-Iloilo Chapter President Fulbert Woo, luyag sang PCCI nga magpakig-angot sa mga startups tuhoy sa mga oportunidad nga pwede mahatag sa ila.
“The private sector is interested in supporting the startup, that’s why we are here,” sambit ni Woo. (AAL/LMLE/PIA Iloilo)
