SYUDAD SANG ILOILO (PIA) – Ginkilala sang administrasyon sang West Visayas State University (WVSU) ang kinahanglanon sang institusyon nga mangin isa ka “full research university” para sa mga estudyante sini nga mas mangin maalam kag maabilidad, ilabi na sa kinahanglanon sang kalibutan.
Ginhatagan ini sang importansya ni WVSU president si Dr. Joselito Villaruz sa iya state of the university address sang Enero 28, 2025, kun sa diin iya ginpahayag nga makatuga ini sang mas daku nga benepisyo para sa mga estudyante kag sa unibersidad.
“Where are we going? What preferred future do we envision? The transformation into a research university is essential and non-negotiable. While complete transformation may still be on the horizon, the long-term benefits will be substantial,” pahayag niya sa iya mensahe sa WVSU Cultural Center.
Ginhatagan man pagtamod ni Villaruz nga ang WVSU nakahimo na sang daku nga tikang sa pagpanalawsaw nga makita man sa mga kadalag-an nga nabaton sang institusyon, pareho sang Commission on Higher Education (CHED) Regional Awards for Research kag ang paglakip sang WVSU sa Top 100 nga mga unibersidad sa Pilipinas sang Edu Rank, base sa mga resulta sang pagpanalawsaw, pagkabantog sa akademiko, kag impluwensya sang mga alumni.
“Teaching and learning initiatives remain our primary research area, reflecting our sustained commitment to educational progress. Our research activity has remained healthy, with a peak in 2023, where we completed 279 projects, exceeding 226 in 2022. In 2024, research output continued robustly with 274 projects,” dugang pa ni Villaruz.
Samtang, ginhatagan man pagtamod ni Villaruz ang plano sang administrasyon sa pagpasanyog sang ila health profession programs sa pagdugang sang Bachelor of Science in Radiologic Technology sa WVSU Janiuay Campus, kag sang West Visayas State University Expedited Select Track for Medicine (WESTMed) nga programa sa Main Campus.
“This is actually a recommendation from the Office of the President and the Commission on Higher Education (CHED). CHED will give us a P40 million grant to start the program but since the facilities are already tight and maximized at the main campus, so we will be offering it at the Janiuay campus,” siling pa niya.
Magluwas diri, ginpresentar man ni Villaruz ang iban pa nga mga nahimo sang unibersidad, subong man ang palaabuton nga mga plano sang iya administrasyon para sa institusyon. (AAL/JNH/PIA Iloilo)
