MULANAY, Quezon (PIA) — May 250 mangingisda at 250 magsasaka sa bayang ito ang nabigyan ng iba't ibang kagamitan gaya ng fertilizer, drums, hose, mga pananim, at gasoline sa idinaos na konsultasyon na dinaluhan ni Gov. Angelina Tan kamakailan.
Dito ay dininig rin ng gobernadora ang mga suliraning kinakaharap ng mga magsasaka at mga mangingisda.
Kaalinsabay nito, naipamahagi sa 187 na mamayan ng Mulanay, Catanauan, San Narciso, at San Andres ang tulong pinansyal mula sa programang Aid to Individuals in Crisis Situation o AICS at namigay rin ang Department of Social Welfare and Development ng mga relief package.
Naging katuwang naman sa paghahatid ng serbisyo sina Vice Governor Third Alcala, Board Member John Joseph Aquivido, Board Member Jacky Delimos, at Mayor Aris Aguirre.
Dumalo din dito ang mga kinatawan ng Provincial Social Welfare and Development Office (PSWDO), Provincial Treasurer's Office (PTO), Office of the Provincial Agriculturist at ang lokal na pamahalaan ng Mulanay.
Ang konsultasyon ay idinaos bilang pagbibigay ng pagpapahalaga sa mga magsasaka at mga mangingisda sa bayan ng Mulanay. (Ruel Orinday-PIA Quezon)