Masansan a marikna ditoy probinsia ti gingined, a no dadduma pay ket mamin-ano iti maysa bulan a mapadasan ti nasao a mangpakebba ti barukong dagiti umili.

No man pay addan ti padas ti probinsia ti Ilocos Sur iti naudi a 7.0 magnitude a panaggungon ti daga idi Hulio 2022, ti nasao a didigra ket saan a maysa a pasamak a mabalin nga ibilang kas nalaka a pakairwaman.

Ti kasta, segun ti opisial a Facebook ti Office of Civil Defense (OCD), dagiti sumaganad ti nasken nga aramiden no adda ti gingined:

Iti Uneg ti Pasdek

- No adda iti uneg ti pasdek, agtalinaed a kalmado.

- Ubraen ti Duck, Cover, and Hold.

- Aglemmeng iti sirok ti lamisaan ken kumpet iti daytoy.

- Agridam iti posibilidad iti aniaman a pangta.

Iti Uneg ti Pagubraan

- Isagana iti plano ti panagbakwit iti uneg ti pagubraan.

- Kabisaduen dagiti rumuaran.

Iti Uneg ti Pagadalan

-No adda ti mapasamak a napigsa a gingined, salakniban iti bagi manipud dagiti agtinnag a bambanag a kas iti nabuong a sarming, ceiling fan, ken dadduma pay.

Iti Uneg ti Komunidad

- Mangisayangkat ti orientasion wenno panangipakaammo dagiti impormasion mainaig iti gingined ken panagsanay no adda ti gingined.

- Panagaramid ti plano iti panagbakwit no adda ti gingined.

Iti Uneg ti Pagtaengan

- Ipakaammo iti pamilya ti earthquake evacuation plan wenno plano iti komunidad no adda ti gingined.

Mangisayangkat ken makipaset iti regular a panagsanay iti nasken nga aramiden no adda ti gingined.

Gapuen ta ti pagilian a Pilipinas ket masansan a makapadas ti gined, adda iti idadauluan ti OCD a Nationwide Simultaneuos Earthquake Drill wenno NSED iti tunggal tallo a bulan tapno maitandudo iti panagsagana dagiti umili ken pannakaammoda iti maaramid no adda ti gingined.

Segun met kenni Rhon A. Arquelada, Provincial Dissater Risk Reduction and Management Officer ti probinsia, iti pannakisarita ti Philippine Information Agency Ilocos Sur iti programa ti daytoy nga Ammuentayo, “Daytoy panagaramid tayo ti NSED ket saan nga asi-asi nga earthquake drill gapuen ta adda ti aramidentayo nga Incident Command System (ICS).”

Inlawlawagna a daytoy ICS ket kayatna sawen ket adda mangimaton dagiti personnel ti naduma-duma nga ahensia nga agresponde iti panagsanay.

“Adda ti mangidaulo iti drill, adda ti section chief, ken dadduma pay tapno masigurado nga masurot ti umno a sistema, ken tapno dagitoy agresponde manipud ti saba-sabali nga ahensia ket saan to a maallilaw ken marigatan a mapan tumulong kadagiti agkasapulan,” kinuna ni Arquelada.

Inpaganetget pay ni Arquelada ti kinapateg ti panagsanay babaen ti NSED.

Kinunana a makatulong daytoy tapno maamuan dagiti umili ti rumbeng nga aramiden kalpasan ti panag-Duck, Cover, ken Hold.

Innayon na nga ti dadduma ket saanda ammo no sadinno dagiti pagbakwitan wenno iti maawawagan nga assembly area wenno pagu-ummongan ti tattao kalpasan ti gined iso ti maysa pay nga rason a kasapulan dagiti kastoy nga aktibidad. (JCR/MJTAB/ATV, PIA Ilocos Sur)