SYUDAD SANG ILOILO -- Sa ginhiwat nga Western Visayas Year-end Information Officers Conference, ginpasidunggan sang PIA ang mga Information Officers, mga talatapan, kag mga hilikuton nga may kaangtanan sa pagpakigbahin sang mga impormasyon tuhoy sa mga programa kag serbisyo nga ginaaman sang gobyerno.

Tinutuyo man sang ini nga kahiwatan nga hatagan sang pagtamod ang importansya sang government information work sa pagsulong sang kawsa sang mga ahensya sang gobyerno kag mga local government units.

Sa kategoriya sang Best Performing Information Office, tatlo ka mga information offices ang ginkilala tuhoy sa ila pagpanikasog agud mapasanyog ang DevCom sa komonidad. Ini ang ginlakipan sang Passi City Information Office, Iloilo City Public Information Office, kag Iloilo Province Public Information and Community Affairs Office.

Ginkilala sila bangud man sa exemplary performance sa patag sang information dissemination, media relations kag mga adbokasiya.

Nangin isa sa mga Hall of Fame awardees naman para sa Best Performing Information Officers category si Ma. Lucy Sinay.

Sa pihak nga bahin, ginakabig ang print publications bilang isa sa mga epektibo nga pamaagi agud mapaalintun ang mga hilikuton, proyekto kag milestones sang mga ahensya sang gobyerno, LGUs, bureaus ukon mga  departamento sang mga sektor sang gobyerno.

Nalakip sa ginhatagan padya sa idalom sang Best Newsletter category amo ang Kauswagan sang Iloilo City.

Ginkilala man sang PIA-6 ang mga ahensya sang gobyerno kag mga LGUs nga padayon sa pagamit sang potensyal sang Facebook sa pagpalapnag sang kawsa nga gobyerno.

Kaupod sa mga ginpasidunggan bilang Best Facebook Page amo ang Iloilo City government (First Place) kag Iloilo Science and Technology University (Third Place).

Ginpangunahan naman ni PIA Director General Jose Torres, Jr. kag Deputy Director-General for Strategic Communication and External Affairs Katherine Chloe de Castro ang paghatag sang pasidungog bilang isa sa mga highlights sang IO Conference.

Sa iya mensahe, ginpaalintun ni Torres ang importansya sang pagpalapnag sang programa kag mga serbisyo sang gobyerno sa mga komonidad sa bulig sang mga Information Officers.

‘‘Nagsasama-sama tayong lahat upang pag-usapan ang mga importanteng issues at bagay at magkakaisa po tayo kung paano natin ibaba sa taumbayan ang impormasyon, mensahe, at programa ng pamahalaan,” suno kay Torres.

Bangud man sap ag-uswag sng teknolohiya, gin-abisohan ni DG Torres ang mga Information Officers nga hibaluon anay ang mga impormasyon antes ipakigbahin sa mga social media sites. (AAL/LMLE/PIA Iloilo)