Ang dya nga pasilidad nagabalor P28 milyones kag may nagkalain-lain nga mga kagamitan para sa mga serbisyo kaangay kang proximate nutrient analysis, microbiological analysis, shelf-life testing, sensory evaluation, kag soil and water analyses nga kinahanglan sa pagsiguro kang food safety kag quality.

Sa anang mensahe sa inagurasyon kang laboratoryo, ginhambal ni Dr. Enrico Paringit, executive director kang Philippine Council for Industry, Energy, and Emerging Technology Research and Development (PCIEERD), nga ang UA CATL nagadara mas marapit sa mga Antiqueño kang importante nga laboratory services sa food industry.

Bangud sa mga kagamitan sa laboratoryo nga may bag-o nga teknolohiya, makabulig ang CATL sa mga estudyante, manunudlo, kag propesyonal sa pagpasangkad kang research experimentation kag collaboration, paghanas kang teknikal nga kinaaram, kag pagpatigayon kang mas dalom nga interes sa siyensya, teknolohiya, kag inobasyon.

Kadungan sa CATL, gin-inagurahan man kang DOST kag UA ang duha pa ka mga bag-o nga pasilidad sa sulod kang UA main campus – ang DOST-Antique Provincial Science and Technology Office (PSTO) kag Antique STARTUP Innovation Hub (iHUB) nga tuyo magbulig sa pag-ugwad kang mga bag-o pa lang nga negosyo ukon proyekto.