MANILA, January 5 (PIA) -- Aron mapalig-on pa ang Bayanihan Spirit sa nasud, gi-aprobahan ni Presidente Ferdinand R. Marcos Jr. ang Memorandum Circular No. 41 nga nagmando sa tanang ahensya sa gobyerno ug nag-awhag sa mga local government units sa paghandum sa "Community Development Week" ug "Community Development Day" matag unang semana sa Enero matag tuig.

Base sa Memorandum Circular No. 41 nga gilagdaan ni Executive Secretary Lucas Bersamin nga gipetsahan og Enero 3, gusto ni Presidente Marcos nga magpabiling buhi ang diwa sa Bayanihan Spirit ug hatagan og bili ang kooperasyon sa komunidad.

Niini gitahasan ang Department of the Interior and Local Government (DILG) sa pagtinabangay sa non-government ug people's organizations aron mangulo sa mga aktibidad ug programa alang sa tinuig nga "Community Development Week" ug "Community Development Day."

“All national government agencies and instrumentalities, including government-owned or -controlled corporations, government financial institutions, and state universities and colleges are hereby directed, and all local government units are encouraged, to extend full support for, and cooperation in, the conduct of relevant activities and programs during the annual celebration of the Community Development Week and Community Development Day,” nakalatid sa duha ka pahina nga Memorandum Circular.

Ang unang semana sa Enero ug Enero 6 sa matag tuig gideklarar nga Community Development Week ug Community Development Day, pinaagi sa Proclamation No. 316, (s. 1994) sa tinguha nga mapataas ang kahibalo sa katawhan sa Bayanihan Spirit ug ang bili sa kooperasyon sa komunidad.

Ang proklamasyon nagtumong usab sa pag-ila sa bililhong kontribusyon ug hiniusang paningkamot sa gobyerno ug non-government organizations sa pagpalambo sa mga lokal nga komunidad, people empowerment ug community mobilization. (ECB/PIA7-Bohol)